uMthunywa
silo Pumulani Mpofu
INENGI lezimuli zakulezi insuku sezikhula nje zingaphelelanga ngoba kwesinye isikhathi ubaba uyabe engekho kumbe umama. Ukwehlukana kwabazali kuyaphambanisa izimuli. Inengi labazali liyalibala ukubana ukuba ngumzali akupheleli ekuthatheni incwadi yokuzalwa kodwa-ke kuyahamba kuze kufike kusibanga sokuthathwa kwesithupha.
Loba-ke ubaba engekho, kukhona isigaba esidinga ubaba ukuze umntwana athole isithupha njengoba eyabe eseleminyaka elitshumi lasithupha.
UHulumende sowasiqakathekisa kakhulu isithupha yikho nje izikolo ezinengi zingasavumi ukuba umntwana abhale imihloliso yelizwe engelaso isithupha njalo isithupha sisebenza kakhulu lalapho umntwana esephatheka kumincintiswano yesikolo efana leyokugijima, ukudlala ibhola lokunye nje okunengi okutholakala ezikolo.
Kule iviki ngithole ithuba lokuphathisana lojaha okuthiwa nguFikile Gumpo. UFikile wazalwa ngunina uSibuyile kanye loyise uTendai owayevela eMasvingo. UTendai wayezalwa khona eMasvingo njalo ethathele isithupha sakhe khonale. Abazali bakaFikile benelisa ukubana bamthathise incwadi yokuzalwa kodwa basebesehlukana.
Ekwehlukaneni kwabazali uFikile wasala esehlala logogo wakhe ozala unina. Unina kaFikile yena wasuka waqonda eGoli ethi uzama ukuthola okungamphilisa khonale ukuze enelise ukugcina uFikile.
Ngokuswelakala kwenhlanhla uNakaFikile wafika wadliwa zindunduma zaseGoli. UTendai laye kaziwa ukubana wasuka wayangaphi. Ugogo wazikhulisela-ke umzukulu wakhe wafunda waze wafika kubanga likaFomu 4. Inkinga yaqala-ke ukuvela ngoba esikolo kumele uFikile abhale eselaso isithupha. Umthetho weZimbabwe uthi nxa uthatha isithupha kumele wazi usobhuku wekhaya lapho ovela khona kanye lenduna, njalo kumele ubelesithupha somzali ohlala laye kanye lencwadi eveza lapho ohlala khona.
Kwabanzima-ke ukubana uFikile athathe isithupha ngoba kwakufuneka ukubana azi induna losobhuku wekhaya lapho uyise avela khona. Wazama-ke ukubhoda labomakhelwane ezama ukubuza ukubana induna losobhuku beMasvingo ngobani. Kwaze kwadlula inyanga elokhe edinga kodwa kazange athole omphathisayo ukubana athathe isithupha.
Weza-ke kunhlanganiso yaseTrinity ezodinga usizo ukuze athathe isithupha enelise ukubana alobe imihloliso njalo azilungisele ikusasa lakhe. Lathi-ke njengeTrinity sabhoda satshaya lencingo saze sabathola osobhuku lenduna zaseMasvingo. Wagijima-ke uFikile waqonda emahofisini wenelisa ukubana athathe isithupha. Kuyinto ejabulisayo ukubana abantu basizakale enhlanganisweni yethu.
Asihlanganeni njalo kuviki ezayo.
Umlobi utholakala kukheli ethi [email protected] loba kunombolo ezithi 0773195055.
