uMthunywa
UKUZA kukamongameli weFifa kuleli kuliviki kuzaphakamisa isisindo somdlalo wenguqu njalo kuyisibonakaliso sokuthi iZimbabwe iyahlonitshwa kwezemidlalo.
Lokhu kukhulunywe nguMphathintambo wezemidlalo uMakhosini Hlongwane ngesikhathi echaza ukujabula kwakhe ekuthini uGianni Infantino uzakwethekelela esigodlweni.
U-Infantino unxuswe ukuzothakazelela ilanga lokuzalwa kukaPhilip Chiyangwa, umongameli weZifa.
“Umbiko wokuza kukamongameli weFifa kuyasithabisa ngoba kutshengisa ukuthi isizwe siyahlonitshwa kwezenguqu.
Loba isizatho sokuza kwakhe kuyikuzothakazelela ilanga lokuzalwa kukaPhilip Chiyangwa, thina kwezemidlalo sikubona kulinyathelo elihle lokwakha ubudlelwano lenkokheli yenhlanganiso enkulu kumdlalo wenguqu,” kutsho uHlongwane ekhuluma loMthunywa ngeSonto.
Andubana avakatshele eHarare, uInfantino wenze umhlangano lenkokheli ezingamatshumi amahlanu ezenhlanganiso zenguqu eAfrica. Umhlangano lo oqhutshelwe eGoli, uqale ngoLwesibili.
Indikimba yalumhlangano, ngokubika kwenhlanganiso yeCosafa, yikuhlaziya inhlupho ezikhangelane lomdlalo wenguqu eAfrica kanye lokuxoxisana ngodaba lokukhwezwa kwenani lamaqembu azaphatheka kunkezo yomhlaba.
Umhlangano lo ngowakuqala phakathi kweFifa lamazwe eAfrica wonke. Inkokheli zijwayele ukuhlangana nxa kubizwe umbuthano omkhulu weFifa Congress.
“Umongameli weFifa uGianni Infantino uhlangana labaphathi benhlanganiso zamazwe adlala inguqu eAfrica kusukela ngoLwesibili.
“Ngemva kwalokhu, uInfantino uzakuya eZimbabwe elande umcimbi wokuthakazelela ilanga lokuzalwa kukamongameli weZifa leCosafa uPhilip Chiyangwa,” kutsho umbiko ophawulwe yiCosafa.
