uMthunywa
NGESONTO amaqembu ebhola likanobhutshuzwayo iHighlanders leFC Platinum ahlangana kubangwa inkezo yamabutho eyaziwa ngokuthi yiZNA Charity Shield. Kulumdlalo, kuzagcwala kuthi phamu eBarbourfields abathandi benguqu belande ukuzobona ukuthi yibaphi abadlali abatsha abakhona kumaqembu.
IHighlanders zintshantshu zalinkezo ngemva kokuyiphakamisa ngomnyaka ophelileyo. Okuzahuga ababukeli yikungena kukaRoderick Mutuma enzinkini yabagadli beHighlanders.
Abaqoqi benkezo bathe ibutho lithole usekelo lwemali engange $60 000 lonyaka. Iqembu elizanqoba lizathola i$12 000 kuthi lelo elizaphetha likunombolo yesibili lizaphiwa i$8 000.
Umdlalo lo uyingxenye ye-semi-final yalinkezo. Omunye umdlalo udibanisa iCaps United leDynamos ngelanga elifanayo.
Amaqembu womabili la yiyo wodwa alungiselele isizini ka2017 ngokuyagijima eSouth Africa. Kumalungiselelo alisizini, iqembu leFC Platinum selihambe isibanga eside ngokudlala inguqu kusukela ngoZibandlela kukanti iBosso ibiphatheka kumidlalo emincinyane yobungane.
Izimbamgodi zikhanya ziqinile njengoba kuyizo ezaqala ukuya eGoli zadlala lentshantshu zeAfrica Mamelodi Sundowns okobungane. IBosso ifikile kulelo lizwe yadibana lamaqembu abalisa iBaroka FC, kulolongelwa ukuzohlasela ekhaya.
Ngalelolanga kukhangelelwe njalo ukuthi umqeqetshi weBosso uErol Akbay avule amehlo ngoba iqula leFC Platinum alisoze livume ukwehliswa lona seliyilungiselele ngamandla isizini ka2017.
Umqeqetshi lo walile ukutsho okunengi ngeqembu lakhe, wabika ukuthi baphezulu kokulolongela umdlalo.
“Umdlalo lo siwulungiselele njengayo yonke imidlalo,” kutsho uAkbay ngesikhathi elolonga iqembu ngoLwesibili ekuseni.
Amathimu womabili acina ukungqikilana mhlaka 20 kuLwezi, 2016 lapho izimbamgodi zeFC Platinum ezanqoba khona iBosso 3-0 kumdlalo weligi.
Inkunzi zenguqu lezi zidibana kulinkezo lokhe yasungulwa ngo-2013. Inkezo le idlalelwa ngamathimu amane.
Isikhulu sabaqeqetshi beBosso uCosmas “Tsano” Zulu ulokukholwa ukuthi uAkbay nguye umqeqetshi ozayiqethula iFC Platinum.
Umbiko ophuma kubaqoqi benkezo yeZNA Charities ukhuthaza ababukeli bomdlalo ukuthi bagcwale ngobunengi babo Emagumeni.
Imidlalo: Highlanders v FC Platinum (Barbourfields Stadium); Caps United v Dynamos (Rufaro Stadium).
