uMthunywa
Ncekwenhle Ncube
IKHALA ezimathonsi enye indoda yesigabeni seMambale eKezi ngemva kokuthola ukuthi unkosikazi wayo owabhubhayo wayidlisa ikhanda likafudu okwenza ukuthi ihloka lakhe lingagamuli emzini.
Loludaba olutshiye amadoda akule indawo emdambiyana ivele emavikini amabili edluleyo ngesikhathi uMnumzana Nkosana Ndlovu (47) esaliwa ngunkosikazi wakhe abeselenyanga ezimbili emthethe ngoba ethi ihloka lakhe liyanyamalala nxa sokumele baye emacansini.
UMthunywa uxhumane lelinye ijaha elisuka kule indawo elithande ukwaziwa ngokuthi nguVelani Ngwenya elibike ukuthi uMnu Ndlovu wehlukana lonkosikazi wakhe ngenxa yokuthi isitho sakhe basidinga basiswele nxa sokumele baye emacansini.
“Mina ngezwa ngezami indlebe sisebhawa koSamuel umalume uNkosana esithi inyanga yakhe imtshele ukuthi wadliswa ikhanda likafudu yikho engenelisi ukuthi ayemacansini labanye abafazi ngaphandle kwalo owamdlisayo lanxa sowabhubha.
“Uthe yikho okwenze umkakhe lo abesanda kumthatha ahambe ngoba lokhe bathathanayo ihloka lakhe liyanyamalala,” kuchaza uMnu Ngwenya.
Abasiki bebunda babike ukuthi uMnu Ndlovu ubethi nxa selungele ukungena emacansini lonkosikazi wakhe omutsha isitho sakhe sifinyele sakhanda likafudu nxa engabona abantu.
Lokhu kwenza waze wayadingisisa kubosiyazi abamtshela ukuthi wadliswa ngunkosikazi wakhe wakuqala ayemthethe eBotswana ngesikhathi esasebenzela khona.
Omunye umfakazi ongathandanga ukubethwa ngebizo uthe inyanga kaMnu Ndlovu yathi kufunakala ikhanda lensingizi ukuze imelaphe.
“Kwabanzima ukuthi bamelaphe ngoba inyanga yathi ifuna ikhanda lensingizi. Manje khathesi kunzima ukuthi ayibulale ngoba ungabulala inyoni le liyafa liphele du.
“Ngikhuluma nje akabonakali kukhanya wabuyela eBotswana ukuyadinga usizo khonale,” kulandisa umfakazi lo.
Ekhuluma lentatheli UMnumzana Kole Ndlovu umnewabo kaNkosana uphike wemba phansi ukuthi kulendaba enjalo ngomfowabo.
“Abantu balamanga, ayikho into enjalo. Umfowethu wafelwa ngunkosikazi wakhe wathatha omunye kodwa balana ngoba bengazwisisani kuphela. Lokhu ukuthi wadliswa sikuzwa ngawe. Lingabodinga izinto ezingaqondananga lani,” kutsho uMnu Kole Ndlovu.
Omele usobhuku wakulesi isigaba uNkosikazi Sibukiwe Moyo uthe udaba olunjalo baluzwa noma bengelaso isiqiniseko ngalo ngoba ubaba lo esebenzela phandle kwelizwe isikhathi esinengi.
“Udaba olunjalo sizwe ngelikabathi ngoba umnikazi wodaba kakaze asiqonde edinga usizo ngoba engumuntu ongahlalahlaliyo ekhaya,” kutsho uNkskz Moyo
UMnumzana Prichard Ndebele obona ngezamasiko uthe izehlakalo ezinjalo ziyenzeka noma nje zingandanga.
Kwande ukwenziwa ngumama olesikhwele ongafisi ukubona owangakwakhe ephumela ngaphandle edinga elinye inina.
“Kuyenzeka esintwini izinto ezinjalo kodwa-ke kuvame kubomama abalesikhwele abangafisi ukubona omkabo belamanye amakhosikazi bona besasekhona.
“Nxa umuntu esethe wahlangana lohlupho olufana lalolu ngoba unkosikazi wakhe seye kwelemagadini akumelanga ethuke ngoba yinto elungisekayo. Kungakho ubaba lo angethuki kabone abadala bemncedise ngamakhambi angawasebenzisa ukuqeda inkinga yakhe le,” kutsho uMnu Ndebele.
