uMthunywa
Ncekwenhle Ncube
NGABE kambe ufikelwe yisilingo sikaDavida na?
Kulomfundisi webandla leJesus Never Fails Institute owale umzalwane akade ethandana laye ebandleni lakhe ngemva kokuba esezithwele.
Umfundisi lo, uPritchard Moyo, kubikwa wangena emambathweni lomunye unkazana webandla lakhe okuthiwa nguJoyce, wabamba isisu, ngemva kokumthembisa ukuthi uzamthatha.
Ibandla lalumfundisi libuthana kwenye ikolitshi ekoBulawayo.
Kubikwa umfundisi uMoyo ohlala elokitshini leNjube kuthe sekuvele ukuthi usemithise umzalwane, wacetshiswa ngesinye isikhulu sebandla ukuthi aphike isisu njalo amale luntombazana ngoba ikhona enye intombi okumele atshade layo.
Kubikwa kulowesifazana owasugula ibandla leli odla amahabula ethi uMoyo aphike ukuthi wamithisa umzalwane.
UMthunywa uphethe ingxoxo yeWhatsApp lapho intombi le eyoniwayo okuthiwa nguJoyce aveza sobala isihluku asenziwa ngumfundisi lo. Kulingxoxo kuvele ukuthi uMoyo ubethandana loJoyce Mangoma okwesikhathi eside loba nje wayesazi ukuthi ikhona intombi ayigcinelwe libandla, okumele ayithathe.
Ku-WhatsApp le ephethwe liphephandaba likazulu, omunye umfakazi oqotho ongathandanga ukubethwa ngegama uchaze ukuthi uMfundisi uMoyo wephula isithembiso sakhe kuJoyce.
“Umfundisi wayethembise uJoyce ukuthi uzamthatha baze bahlangana emacansini. Ngemva kwesikhatshana uJoyce wabikela uMoyo ukuthi usezithwele umfundisi wathaba waze wakubona lemoyeni ukuthi intombi yakhe izabeletha mhlaka 22 Ncwabakazi kuwonalo umnyaka.
“Kuthe ngemva kwalokhu inina elasungula ibandla elingumfundisi omkhulu ebandleni, ophinda ancedise ngezimali ebandleni wathi umfundisi engamthathi unkazana lo ngoba yena usemtholele umama wokuthatha omfaneleyo.
“Ngemva kwalokho umfundisi wahle wala uJoyce njalo wathi engakhulumi laye njalo engamfoneli ngoba usemxotshela imali yakhe.
Okubuhlungu khathesi yikuthi abanye abakhulu bebandla kubikwa bathumezela uJoyce imbiko kuWhatsApp bemthembisa ukuthi ngeke aqede u2017 ephila ngoba bazamthuka afe,” kutsho umfakazi lo.
UMthunywa udingisise ngodaba lolu kuJoyce, oveze ukuthi kubuhlungu akwenziwa ngumfundisi uMoyo.
“Ngesaba ukuthi ngikhulume kodwa konke okufunayo kukuWhatsApp. Mina okwenza ngiqine ngokufuna ukuthi uMfundisi Moyo avume isisu sakhe, ayisikho kuthi ngifuna ukubhidliza ibandla. Okungizwisa ubuhlungu yikuthi kulabanye abakhulu bebandla asebemkhuthaza ukuthi aphike isisu lesi.
“Mina ngizaqina ngendaba yami ngoba ngizama ukuthi kwelakusasa abanye abesintwana bangahlukuluzwa ngabafundisi bazithulele. Kumele sikhulume nxa bethe basona, ngimele amalungelo abomama angifuni kubhidliza ibandla mina,” kutsho uJoyce.
Kufikile endlebeni zikaMthunywa ukuthi uMfundisi uMoyo wadingelwa intombi okuthwa nguTamara esebenza kwenye indawo ethengisa okudliwayo enzikini yedolobho lakoBulawayo.
Imizamo yokudinga uTamara yehlule. Ezinye izisebenzi zakulindawo zithe azimazi.
Ebuzwa mayelana lodaba lolu uMfundisi uMoyo uvumile ukuthi yena wahlangana loJoyce emacansini kodwa kazange azithwale uqamba amanga ngoba uhlala efunga ethi ufuna ukudiliza ibandla lakhe.
“Angali ukuthi ngahlangana lontombazana lo emacansini kodwa lokhu sakwenza kanye nje.
Wabuya endlini yami ngoba esazi ukuthi mina angithathanga. Wazihlalela wakwejisa kwathi sokuntambama wathi kabuyeli ngakibo uzalala kimi.
Wathi uyangithanda kakhulu ngakho ubeswela ukuthi uzangitshela njani.
“UJoyce kasonti kwelami ibandla, wabuya kabili ezovakatsha, yena ungena iJehova’s Witness.
“Kukhanya bakhona abasebenzelana laye ukuthi badilize ibandla lethu. Sengithole imilayezo eminengi ingithembisa ukuthi ibandla lami lizadilika,” kuphetha uMfundisi uMoyo.
