uMthunywa
KULE iviki ngezimnandi kuphela kuphephandaba likazulu njengansukuzonke nanku phela liye layavumbulula iqembu lodumo kwezomculo we-rhumba iqembu elidabuka eLupane. Kalitshayi nje leliqembu lenza izimanga.
Angithi nje leliqembu yiTshongogwe Masters eliholwa nguNkosikhona Ngwabi ijaha elimajaha mabili. Kalitshayi nje isiginci lelijaha liyaphoxa bakwethu. Othanda ukunambitha uluju kule iviki kaxhumane lengxoxo enambithekayo phakathi komculi wodumo uNkosilathi Ngwabi (NN) lentatheli yephephandaba likazulu uCornelius Luphahla (CL).
CL: Umphakathi uthanda ukwazi mayelana lembali yakho kanye leyomculo wakho jahelibanzi.
NN: Mina ngazalelwa esigabeni seTshongogwe eLupane ngafunda eTshongogwe Primary ngaze ngaqeda uGiredi 7.
Ngemva kwalokho ngaqhubeka ngezifundo zami ngayafunda eNhlanhla Secondary uFomu 1 ngaze ngayaqeda uFomu 4.
Ezokucula ngaziqalisa ngesikhathi ngisafunda e-primary lapho engangicula ngikuqembu lesicathamiya. Kuthe ngesikhathi sengise-secondary ngaqalisa ukutshaya isiginci. Ngomnyaka ka-2015 ngabona kungcono ukuthi ngizisungulele iqembu lami lezomculo okuyilo engiliholayo lakhathesi.
CL: Lokhe waqala ezomculo sowakhipha amadlalade amangaki jahelibanzi?
NN: Njengomculi osasungula sengakhipha amadlalade amabili. Elakuqala ngalikhipha ngomnyaka ka-2015 elithi Sekuf’ umuntu, kanye lelika2016 elithi Iqiniso liyavela.
CL: Uvame ukudlalela ngaphi ingoma zakho mfokaNgwabi?
NN: Ingoma zami ngivame ukuzidlalela kuma shows engiwenza ikakhulu kweleSouth Africa kanye lakwelakithi koBulawayo. Ngiyavuma njalo ukudlala emikhosini etshiyeneyo efana lamadili okuzalwa kanye lemitshadweni.
CL: Abantu bathini ngomculo wakho njengomculi osasungula njalo ukhangelele ukubenzelani lomnyaka?
NN: Abantu bayawuthakazelela kakhulu umculo wami bathi ngiqhubekele phambili ngibajabulisa. Okunye njalo bathi bajabuliswa ngumlayezo osengomeni zami ngoba uyimfundiso kanye lesixwayiso esikhulu kuzulu.
Lonyaka ngikhangelele ukubakhiphela iDVD yengoma zami esengiziculile ngibuye njalo ngibahwatshele elinye idlalade elitshisayo ekupheleni komnyaka.
CL: Ngaphandle kokucula msebenzi bani owenzayo empilweni?
NN: Ngaphandle kokucula mina ngingumakhi kodwa ngiqakathekisa kakhulu ukucula.
CL: Bunzima bani oyake uhlangane labo kwezomculo njalo nkuthazo bani oyipha abaculi abasasungula?
NN: Ubunzima engiyake ngihlangane labo kwezomculo yikuswela imali yokuzithuthukisa kwezomculo. Okunye njalo ngihlutshwa ngabantu abatshontsha umculo wami bawuthengise ngentengo ephansi okudala ukuthi kubenzima ukuthuthuka kwezomculo ngoba nxa sengiwuthengisa ngentengo ephezulu abantu kabawuthengi kuhle.
Ngalokhu kubaculi abasasungula ngithi kababambelele kwezomculo bengadeli noma kunzima njalo kabaqakathekise ukubambana labanye abaculi ukuze bathole ulwazi kwezomculo.
