Livuselela amasiko Ibutho Lenqama

23 Feb, 2017 - 00:02 0 Views
Livuselela amasiko Ibutho Lenqama

uMthunywa

Cornenlius Luphahla
MHLAKA 4 Mbimbitho eBerea Park kweleSouth Africa kuzabe kungabizwa ozwayo kumkhosi wezamasiko ohlelwe yinhlanganiso yakuleli iButho Lenqama  ngenhloso yokuthuthukisa kanye lokuvuselela indimi zakuleli.

Umkhosi lo uzaqala ngehola letshumi lanye ekuseni kusiya ntambama. Kukhangelelwe ukuthi umkhosi lo udibanise amaqembu ezamasiko kanye labahlabeleli abatshiyeneyo abazajabulisa uzulu.

UMthunywa uxhumane loMqoqi walinhlanganiso uChristopher Ncube wathi umkhosi lo ujonge ukuphakamisa ezamasiko njalo bakhuthaza uzulu ukuthi aphatheke kuwo.

“Umkhosi lo siwenza minyaka yonke ekuqaliseni komnyaka njalo sawetha ibizo elithi yiNdonsakusa ngoba uletha ukukhanya kwezamasiko ebantwini bakoMthwakazi. Sikhuthaza uzulu ukuthi aphatheke kulo umkhosi ngoba kunengi azakufunda kiwo ngezamasiko.

“Emkhosini lo kuzabe kulabaculi abagoqela Insukamini, Igqishamnkantsha, Amabhukudwane, Amachwane Amahle, uZinjaziyamluma, Abafana bakaGodlwayo, Abafana BakaMzilikazi, Intombi Zosiko kanye lamanye njalo amaqembu atshiyeneyo,” kuchaza uNcube.

Uqhubekele phambili esithi emkhosini lo kuzabe kungenwa mahala ngenhloso yokuthuthukisa amasiko.

“Abafuna amadlalade amaqembu la azabe ekhona ngoba azabe ethengiswa kulo umkhosi,” kutsho uNcube.

Ekhuluma lentatheli umgcinisihlalo walinhlanganiso uAbiater Malinga uthe njengenhlanganiso bavuselela amasiko ngoba kuyindlela yokuletha ukukhanya emphakathini ngembali yawo.

“Kumkhosi lo sikhangelele ukuvuselela amasiko ngoba asetshabalele ikakhulu kwabatsha. Okwenze sawenzela kweleSouth Africa yikuthi sinanzelele ukuthi kulabantu bakithi abanengi abaphila lapha ngakho sibone kukuhle ukuthi labo sibakhuthaze ngezamasiko.

“Sinanzelele ukuthi kwelakithi zinengi inhlanganiso zamasiko ezivuselela ubuzwe bethu ngakho kuhle ukuthi lathi sibuvuselele kulabo abaphila bengaphandle kweleSouth Africa. Ngalokhu sikhuthaza abantu ukuthi babambelele kwezamasiko ngoba isizwe yisizwe ngamasiko aso,” kuphetha uMalinga.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds