uMthunywa
Ngizwa ubuhlungu emacansini
KHULU umkami ungizwisa ubuhlungu nxa sisemacansini. Yena kala sikhathi sokungiphulula lokungijabulisa embhedeni lokhu abakuthi yi-romance. Nxa sesiphakathi komdlalo wethu ungizwisa ubuhlungu angikaze ngikholise emacansini. Okungizwisa ubuhlungu yikuthi yena nguye yedwa umuntu wesilisa engimaziyo kwezamacansi kodwa kalasineke umane angeqele nje njengeqhude.
Impendulo
Kuqakathekile ukuba wena lomkakho, kelixoxisane ngendaba yamacansi, njalo libonisane ukuba lifuna ukuyiphatha njani. Kungenzeka ukuba laye nje wenza into ongayaziyo, mhlawumbe oyicabangelayo ongelaqiniso layo. Kuhle ke ukuba lixoxe ngakho. Kufanele ukunanzelele ukuba akusimlandu wakhe ukuba akudlala dlalise lokhu kungumlandu wenu lobabili ukuba liphululane libambane kamnandi inyama zize zivume, uzuzwe umuntu esephefumulela phezulu amehlo esengani uphethwe yibuthongo kumbe ulengumbane.
Ungahlali ulindele yena kodwa lawe nxa umdlalo usuqala kufanele uthathe isabelo sakho njengo mama, uphenduke isigelekeqe. Lingenza lokhu lizabona ubunandi bempilo yenu njalo lomendo uzakuba luluju oluhle kakhulu. Akudingeki ukuba wazi abesilisa abanengi kodwa lungisanini indaba yenu lonke. Lina ngobubili benu lilomlandu wokujabulisana emacansini. Kungenzeka ukuba laye ufela ngaphakathi.
Umkamfowethu uyangilinga
Khulu ngihlala lomka mnewethu elokitshini khonapha koBulawayo. Udubo yikuthi umfowethu usebenza eGoli kungakho-ke kumaviki edluleyo umkakhe ubengibizela endlini yakhe yokulala wasesithi ngihlale embhedeni.
Ngemva kwesikhatshana sizixoxela waqala ukungiphulula umlenze. Mina ngahle ngeqa ngaphuma endlini ngayavakatshela abangane bami. Ngithe ngiphenduka wangibuza ukuthi bengibalekelani ethi kumele sibe close ngoba ubhudi wami engekho.
Impendulo
Uyindoda mfanawami ngokuzibamba utshiyane lokugcola okunje. Yibo laba abantu esithi yimi hlobo engalodwa nhlanyelo, indumba ezingqhuqhumbo. Indaba owaye funa ukukunika yona ilezidumbu phansi, njalo abanye bafa befungalane ijoyi elilamakhala abonvu. Lingazwanana lophumamphume linikane konke hatshi umfazi. Ungavele ungene elujwini lukamfowenu lingafa lingabonani ngalihlo impilo yenu yonke.
Zama ngedlela zonke ukuzivikela ngokuhamba uyezidingela lawe okwakho ozazidlela utshaya impembe, ungafihlanga lutho. Kumele ubekwazi ukuba okulempondo akufihlwa emgodleni ungakwenza kuza vela kuphela njalo kube lutsheko oluzakugcolisa impilo yakho yonke, njalo olunga gezekiyo. Zigeze ngokuhlala kude legcekeza enje. Nxa eledlala kutheni engahambi ayedinga umkakhe okunguyena owasuka kibo emlandile. Engakuphikelela kuhle ukuba umazise ukuba uzatshela umfowenu.
Kodwa sekufanele unanzelele ukuba kusasa engatshibilika athi wena nguwe obucela njalo ufuna ukumbamba ngamandla. Nanzelela indlela oziphatha ngayo kuye.
Usangithanda yini lubaba Khulu.
