uMthunywa
YiNtatheli kaMthunywa
KULANDELA ukutshiya ezokubhukutsha kukaKirsty Coventry ngomnyaka odluleyo, sekudingakala ukuthi kulolongwe abanye ababhukutshayo abakhangelelwe ukuthi benze ngcono kulo‘‘MaSiziba’’.
Kungumbono wenengi labantu abalandela umdlalo wokubhukutsha ukuthi sekuyisikhathi esifaneleyo sokuthi izikolo zibumbe amathimu aqinileyo ababhukutshayo abalohlonzi abazathola imendulo kumincintiswano yaphezulu.
Imbono le ivele ngemva kokuqhutshwa kuhle kwemincintiswano yokubhukutsha eyeCANA Zone VI esizibeni sakoBulawayo eseBulawayo Municipal Pool.
Lababhukutshi abavela kwamanye amazwe bakhuluma ngokukhululeka ukuthi imncintiswano weCAN Zone VI esanda kwedlula eqhutshelwe koBulawayo itshengise ukuthi iZimbabwe ilakho ukuba yintshantshu kulumdlalo kuminyaka elandelayo.
Imincintiswano le ibigoqela lomdlalo we-Water Polo njalo layo iqhutshelwe esizibeni sakoBulawayo. Lo bekungumbuthano wetshumi lanhlanu kudibana amazwe angezansi yezwekazi leAfrica.
Iqembu lababhukutshi beZimbabwe linqobe okuzwayo, lenelisa ukunqoba amazwe ayesatshwayo abalisa iSouth Africa, iSeychelles leNamibia. Amazwe la alodumo lokubutha imendulo zonke. Kulandela ukuqhuba kuhle kwababhukutshi bakuleli, kube segcekeni ukuthi isizwe silekusasa enhle kwezokubhukutsha.
Umbhukutshi okhangelelwe ukuthi alandele enyaweni zikaCoventry uRobyn Lee uphumele phambili kuqula lababhukutshi abaleminyaka engaphansi kwe-17 yokuzalwa.
ULee ulakho ukuthi amele isizwe kumincintiswano yama-Olympics omnyaka ka-2020. Loba iZimbabwe iqede iyingqwele kwezokubhukutsha, isizwe seSouth Africa sithethe inkezo yokuba yintshantshu kuWater Polo.
Umongameli wezokubhukutsha kuqula elibona ngomncintiswano lo uJace Naidoo ubikele iphephandaba likazulu ngemva kokugqitshwa kwemidlalo ukuba kubalulekile ukuthi abantu bafundiswe ngemidlalo efana lokubhukutsha ngoba ilakho ukutshintsha implo zabadlali abalethalenta.
“Sibonga abaphathintambo bezemidlalo kuwo wonke amazwe esikuwo. Kuqakathekile ukuthi imidlalo ebalisa ukubhukutsha leminye edlalelwa emanzini ifundiswe abantwana. Sesibone impilo zabantu ziguquka zisiba ngcono ngenxa yokuphatheka kumidlalo le,” nguNaidoo lo.
Ekhuluma kumkhosi ofanayo, umphathintambo wezemidlalo kuleli uMakhosini Hlongwane uthe intatheli yizo ezilomlandu wokufundiswa kwabantu mayelana ngomdlalo wokubhukutsha.
Ngomnyaka ozayo ilizwe leMalawi yilo elizaqhuba imidlalo le.
