Uncategorized

Uwindi ujuja abangu-7 eMakokoba

16 Feb, 2017 - 00:02 0 Views
Uwindi ujuja abangu-7 eMakokoba uTeboho

uMthunywa

YiNtatheli kaMthunywa
KULOWINDI otshiye izakhamizi zelokitshini leMakokoba koBulawayo ngempelaviki zitshe amathe ngemva kokugwaza amadoda ayisikhombisa elandelana, uMthunywa uyakuveza lokhu lamhlanje.

Isehlakalo lesi senzakale ngoMgqibelo ntambama lapho uMenelisi Msipha oleminyaka yokuzalwa engu-23 ovela koDakamela eNkayi, obesanda kuphiwa isikhundla sokuba ngukhondekitha emabhasini akoMusawenkosi agwaze uMophias Hama, Mlungisi loTeboho okungasatholakalanga izibongo zabo, Rachide Phongolani, labanye abathathu wabatshiya bebangwa lezibi.

Kubikwa phakathi kwamadoda la, oyedwa umkhuphe ilihlo njalo usesimeni esibi esibhedlela seUnited Bulawayo Hospitals kuthi abathathu balokhu belalisiwe esibhedlela seMpilo. Kukanti abathathu bathungwa bakhitshwa esibhedlela.

UMthunywa uvakatshele elokitshini leli waxoxisana lezakhamizi eziveze ukudideka ngesehlakalo lesi zisithi uMsipha ngesikhathi egwaza abantu ubengathi ufikelwe lidlozi lokubulala ngoba bebengamonelanga lutho.

Omunye usomabhizimusi weMakokoba okhulume loMthunywa uMnumzana Hamu Mpofu uthe kungenzeka ukuthi ingqamu ebisetshenziswa nguMsipha ibilomuthi ngoba indlela agwaze ngayo abantu kayijwayelekanga.

“Ingqamu eyayisetshenziswa nguMsipha sizwa kuthiwa wayithenga kwesinye isihambi esasilemali eyayingeneli ukugada ibhasi. Mhlawumbe yiyo leyongqamu eyayifuna igazi ngoba indlela agwaza ngayo abantu lalamhla lokhu kayizwisiseki.

“Lalabo ababezama ukulamula labo wayebagwaza okuveza ukuthi wayelamandla angazwisisekiyo,” kutsho uMnu Mpofu.

UMnumzana Charles Ncube ongumlamu kaMlungisi omunye wabagwaziweyo uthe uzwa ubuhlungu kakhulu ngoba umlamu wakhe ugwazwe engelacala.

“Mina ngizwa ubuhlungu kakhulu ngokugwaza komlamu wami ngoba uMsipha umane nje wamgwaza ilihlo laphuma khonapho engelacala. Ngikhuluma nje khathesi usesibhedlela seUnited Bulawayo Hospitals njalo sesikhiphe imali enengi kakhulu sizama ukumelaphisa,” kutsho uMnu Ncube.

Uqhubekele phambili esithi okumzwisa ubuhlungu kakhulu yikuthi bebengalwi ngitsho loMsipha.

“Sengisebenzise imali efika phose i$200 sithenga okufuneka esibhedlela, kodwa isimo sakhe silokhu sisibi kakhulu ngoba sengathi into le isisiya engqondweni,” kutsho uMnu Ncube.

UNkosikazi Patience Hama ongumka-Mnu Hama omunye njalo walabo abagwazwayo ubikele intatheli ukuthi yena wamangala umkakhe engaphenduli umakhalekhukhwini wakhe engazi ukuthi usegwaziwe waze wezwa esefonelwa ngumkakhe esesibhedlela.

“Ngalelolanga kusenzakala ngangizama ukutshayela umkami ucingo kodwa lungadojwa. Ngangifuna ukumbuza ukuthi kungani elokhu engakafiki endlini evela emsebenzini sokusebusuku.

“Kuthe ngehola lika-11 ebusuku ngezwa esengitshayela ucingo esithi usegwazwe yisigebengu usesibhedlela seMpilo.

“Lwangitshaya lwangeqa uvalo njalo lokhu ngingelankani ngesenzo sikaMsipha sokugwaza abantu baze babe yisikhombisa. Kungathi ngumuntu owayelomoya owawumfuqa ukuthi enze lokhu,” kutsho uNkkz Hama.

Esinye njalo isihlobo salaba abagwaziweyo esikhulume loMthunywa kodwa esingathandanga ukuqanjwa ngebizo sithe okwenza uMsipha wagwaza abantu yikuthi babebanga imbanje.

“Kulezelamani ezazigoqa imbanje zasezicela umentshisi kumetheswacala kodwa zasezisala ukumbhemisa okuyikho okungabe kwabangela ukuthi abagwaze ikakhulu lo owakhitshwa ilihlo.

“Kwaba buhlungu ngoba wahle wamkhupha ilihlo,’’ kutsho isihlobo lesi.

UMthunywa uvakatshele esibhedlela seMpilo waxoxisana labanye balabo abagwazwa nguMsipha.

UMnumzana Rachide Phongolani uthe wathi evela emsebenzini wathola uMsipha esilindweni wasesenza angathi ukhuluma ecingweni andubana amhlasele.

“Mina ngathi ngivela emsebenzini  e-Ingwebu ngafika ngama eduzane loMsipha esilindweni esiseMakokoba ngilindele ukugada umtshova oya eLobengula. Ngithe ngisamile ngamuzwa ekhuluma angathi usecingweni ethi usebone omunye wabantu abamkhuthuzayo ngakho usefuna ukumgwaza wahle wangigwaza esiphangeni ngawela phansi.

“Ngithe ngisalele phansi ngamuzwa esephinda futhi ukukhuluma angathi ukhalisa ucingo ethi sengimgwazile kungcono ngihle ngimqedise. Ngalesosikhathi ngavuka ngazama ukubaleka kodwa ngangingasela mandla. Lokhu kwangizwisa ubuhlungu kakhulu ngoba uMsipha kangimazi njalo kangizange ngamkhuthuza,” kutsho uMnu Phongolani.

UMaphias Hama laye owagwazwayo yisigebengu lesi ubikele intatheli ukuthi yena ubelindele umtshova uMsipha wafika wathi ulindeni emgwaqweni ufuna ukufa,  wasemgwaza.

“Ngangizimele emgwaqweni ngifuna ukugada umtshova uMsipha wafika wathi ngimeleni sengifuna ukufa na?

Ngamangala ukuthi kungani esitsho njalo ngambona esondela eduzane kwami ngathi ngizama ukumbalekela wahle wangigwaza emhlane ngengqamu ngabaleka ngaqonda ezindlini eziseduze lomgwaqo.

“Abantu bathe bezama ukungilamulela wabagwaza labo bambamba ngesikhathi sebebizane baba banengi,” kulandisa uMnu Hama.

Intatheli yehlulekile ukukhuluma loTeboho ngoba ubengenelisi ukukhuluma ngenxa yokufuthelwa.

UKhansila wakulelilokitshi uMnumzana James Sithole ebuzwa ngale indaba uvumile ukuthi uyayazi wathi isigebengu lesi singabe sasidakwe yizidakwamizwa kumbe kwakukhona imimoya esibusayo.

“Indaba yokugwazwa kwabantu abayisikhombisa yisigebengu kule indawo ngiyizwile. Ngiyabonga izakhamizi zakulelilokitshi ngokubambana kwazo ngoba zenelisa ukubamba isigelekeqe lesi. Ngokubona kwami sasidakwe yizidakamizwa kumbe kukhona umoya owasidonsela ukuthi senze lokhu.

“Sengenelise ukuyabona abasesibhedlela seMpilo bonke kodwa owagwazwa ilihlo ose-United Bulawayo Hospital kangikamboni njalo khona ngizakuyafika,” kutsho uKhansila uSithole.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds