uMthunywa
Ncekwenhle Ncube
IMIDLALO yenguqu yabomama ebikhangelelwe ukuqhutshwa kuyonale impelaviki eSilonga Secondary eGwanda sidluliswe phambili kulandela imbiko evele kumaphephandaba ukuthi kuzaba lezulu lesikhukhula elizaqala kusukela lamuhla kuze kufike impelaviki.
Ekhuluma lentatheli kaMthunywa usomabhizimusi uDavid Moyo onguye oqoqe umdlalo lo uchaze ukuthi amalungiselelo wonke asenziwe osekusele kuphela yikuthi amaqembu abophane imisila kukhanye eliqine kulawo wonke.
“Konke sekwenziwe okugoqela imivuzo ezaphiwa abenze kuhle. Silusizi ngoba imidlalo yethu sesiyidlulisele phambili ngemva kokuthi kubuye isixwayiso kwababona ngezomkhathi ukuthi kungaba lezulu elikhulu elizakuna kakhulu emhlubulweni wakithi.
“Sifisa ukuthi sithi siqhuba imidlalo yethu isimo somkhathi sikhululekile ukuze abantu beze ngobunengi bezobona ukudla kwamehlo.
“Asifisi ukuthi abantwana abangamankazana badlale lapho okugcwele khona amanzi okungenza abanye besale sebegula,” kutsho uMoyo.
Omunye walabo abalungiselelayo uLee Mangena uchaze ukuthi okunye okwenze badlulisela phambili ilanga yikuthi iqembu lamankazana eSilonga lizabe liphathekile ngoba kulemidlalo yokugijima ezabe ikhona esikolo lapha.
Uqhubekele phambili echaza ukuthi kuleqembu leGatsi Queens elivelela emngceleni weMozambique elizabuya ukuzodlala lapha.
Ngenxa yesizatho leso kuyikho imidlalo isizadlalwa kuviki ezayo ngoba kungaba kuhle ukuthi abantu bemzini baphatheke kubi.
“Sileqembu elezwa ngamalungiselelo omdlalo lo laselicela ukuthi lihlanganyele lathi. Besikhangelele ukuthi babuye kule iviki kodwa sesibamisile ngoba sisesaba isimo somkhathi esingenza sehluleke ukuthi umdlalo wethu uqhubekele phambili,” kuchaza uMangena.
Phakathi kwamaqembu la azadlala kuzabe kuleSilonga Secondary, Street Set, New Orleans kanye leGatsi Queens.
