uMthunywa
Ncekwenhle Ncube
UMGCINISIHLALO weqembu leHighlanders uDonald Ndebele usexwayise abalandeli beqembu leli ukuthi bengaqali ukungena enkundleni ngesikhathi kudlalwa ibhola ngoba yikho okudala izikwelede eqenjini.
Lokhu kuza kulandela ukuthi kube lesikwelede esedlula i$1 000 esihlawuliswe iqembu leHighlanders kusizini ephelileyo ngemva kokuba abanye abalandeli beqele enkundleni kukanti abanye bajikijela amatshe ngesikhathi iqembu lidlala lamanye amaqembu.
“Kusizini edluleyo sihlawuliswe imali engedlula i$1 000 eyabalandeli abehluleke ukuzibamba bangena enkundleni okuyinto engekho emthethweni.
“Yikho nje sikhuthaza abalandeli ukuthi basixolele lonyaka betshiye umkhuba wokungena enkundleni ngoba kudala izikwelede eqenjini ezisibisela emuva.”
Kuvele ukuthi kuke kwaba lezehlakalo ezithize ezigoqela ukulwa kwabalandeli lamapholisa okwenze iqembu lahlawuliswa inkalakatha yemali kanti njalo ukungena komfana omncane enkundleni lakho kwenza iqembu lahlawuliswa futhi.
UNdebele ubuye njalo wachazela intatheli ukuthi bonke abazithola beseqa umthetho bengena enkundleni bazajeziswa ngokubotshiswa baphinde bahlawuliswe.
Uthe noma kunjalo lokhu akutsho ukuthi abalandeli kumele bangene enkundleni okwenza becine bejeziswa ngoba iqembu lidinga ukubaxhasa nxa bedlala lamanye amathimu.
Ubuye njalo wanxusa abalandeli ukuthi baze ngobunengi babo lonyaka ukuzoxhasa iqembu kumidlalo yayo yonke ukuze inqobe kanti njalo lokhu kuzaletha imali esikhwameni sethimu yezwe lonke.
ITshilamoya iqede isizini ihleli kunombolo yesithathu kuqala iFC Platinum ilandelwa yiCaps United besekusiza iqembu leMahlolanyama.
Lonyaka iqembu libonakala sengathi lizasayina uRodrick Mutuma obedlalela iDynamos kusizni ephelileyo ukuze azogcwalisa isikhexe esavuleka ngemva kokuphuma kukaBruce Kangwa loKnox Mutizwa abathengwa ngamaqembu aphandle kwelizwe.
