uMthunywa
Ukuthathisa umntwana incwadi yokuzalwa akufani lokucwayiza kwelihlo kodwa kudinga izincwadi eziveza obala njalo ezifakaza ngokuzalwa komntwana. Ngakho kuleliviki sizathi ukukhangela ngokuqakatheka kwaleliphetshana elibizwa ngokuthi yi-birth confirmation record ekuthathiseni abantwana incwadi zokuzalwa.
Umntwana wonke ozalelwe eZimbabwe ulelungelo lokuthathelwa ibirth certificate kodwa ukuthathwa kwayo kuyatshiyana ngokuthi umntwana uyabe ezalelwe ngaphi.
Esikhathini esinengi ibirth confirmation record iba yinkathazo ebazalini abanengi ngenxa yokuthi abenelisi ukubhadala indleko zezibhedlela zalapho abayabe bebelethele khona. Ezibhedlela lakumakilinika abaniki umzali womntwana ongabhadalanga zonke indleko ezibekhona ngesikhathi ebeletha okuliphetshana lokhu.
Ibirth confirmation record nxa ingekho umntwana ebelethelwe esibhedlela kenelisi ukuthatha ibirth certificate kodwa umntwana obelethelwe endlini ulakho ukuthatha incwadi yokuzalwa nxa abazali bakhe bangahamba lomuntu owambelethisayo emawofisini kahulumende okuthathelwa incwadi zokuzalwa (Registry Office) unina womntwana ephethe isithupha sakhe.
Kumaviki ambalwa adlulileyo eTrinity Project sike sethekelelwa nguSiphetheni Ngwenya (45), ohlala esigabeni sakoMakhulela ePlumtree olabantwana abayisikhombisa yena olohlupho lwama-birth confirmation records.
Ebantwaneni bakhe laba abayisikhombisa akula ngitsho loyedwa zwi olencwadi yokuzalwa ngenxa yokuswelakala kwama-birth confirmation records. USiphetheni uthi kalayo imali yokuyabhadala ezibhedlela lapho ayebelethela khona abantwabakhe. Ukuswelakala kwama-birth confirmation record sokwenqabele izibulo likaNtombikayise ukuthi liqhubekele phambili ngezifundo zalo zebanga sikafomu 3.
Kuthi laba abanye abantwana abayisithupha abafundi ngenxa yokuswelakala kwemali kunye lama-birth cornfimation records. Ngakho ukuswelakala kwencwadi lezi yikho osokubangele ukuthi abantwana laba behluleke ukuthola incwadi zokuzalwa, imfundo lokunye nje okutshiyeneyo okungaphathisa impilo zabo ukuthi zithuthuke.
Nxa ibirth confirmation record ingekho abazali abanelisi ukuthathisa abantwana ababelethelwa ezibhedlela kunye lakumaklinika ama-birth certificate.
Ngakho bazali ekulondolozeni amalungelo abantwana kumele liqakathekise ukuthathwa kwama-birth confirmation record ezibhedlela kunye lakumakilinika. Kubalulekile ukuthi abazali nxa belezikwelende bayexoxisana labezibhedlela bakhulumisane ngendlela zokubhadala (payment plan). Ukwenza ipayment plan kuyathuthukisa amathuba okuthola ibirth confirmation record ngakho abazali bayakhuthazwa ukuba bayekhulumisana labezibhedlela ngoba lokhu kulinyathelo elihle kakhulu endleleni yokuthathisa abantwana incwadi zokuzalwa.
Ngakho kungumlandu wenu bazali ukuthi lithathele abantwana ama-birth confirmation record ukuze kubelula ukuthi bathole incwadi zokuzalwa. Imali iyahlupha kuye wonke umuntu kodwa bazali qakathekisani ikusasa yabantwana ngokuthatha ama-birth confrmation records. Ikusasa labantwana akumelanga liphambaniseke ngenxa yenu bazali. Asihlanganeni kuviki elizayo.
Umlobi utholakala ku [email protected] kumbe ku 0773195055
