uMthunywa
NGIKHULUMA ngikhuluma ngokudla okwenziwa ngempuphu yomumbu, amabele, inyawuthi, uphoko lengqoloyi.
Lamhlanje inengi labantu lithambisa imiphimbo yalo ngenamunede nxa ilanga litshisa, yonake ilemihlobo eminengi-nengi okuthi ikhokhakhola leminye nje.
Konke lokhu kuyathengwa ngemali enengi.
Nansi inamunede yesintu eyenziwa ngempuphu le okuthiwa ngamahewu. Wona enziwa njalo anathwa ebusika lapho ilanga selitshisa okukhupha inhlanzi emanzini. Ayaqeda umhawu wokoma lokudinwa nxa ubukade uhamba umango omude kumbe usebenza nzima. Kanti njalo angokunathwayo nje abantu bezihlalele bethokoza.
Ezabelweni amahewu anathwa kakhulu nxa kulelima lokuhlakula loba ukubhula. Kwenziwa ngawo lokhu okuthiwa yisikhulula. Lapha ngizakhuluma ngemihlobo emithathu yokwenziwa kwamahewu, wena ke uzazikhethela umhlobo owuthandayo. Nxa njalo uyithanda yonke ungabe ulokhu uyintshintshanisa.
Okudingakalayo kundlela yakuqala
1 Impuphu yomumbu kumbe eyamabele
2 Imvubelo yempuphu yophoko (imithombo)
3 Ifulawa
4 Itshukela
5 Imbiza lophini
6 Udiwo kumbe iqhaga
Indlela yokuqala yokwenza amahewu
1 Pheka ilambazi elinengi ulijiyise njalo ulenze livuthwe sibili
2 Yephula imbiza uyibeke phansi, khonokho thatha imvubelo yemithombo yempuphu kumbe eyophoko uyifake elambazini, goqoza kuze kuhlambuluke kube lula
3 Yekela ilambazi leli liphole liqande lithi mo
4 Nxa usulizwile ukuthi selipholile isibili, vubela ngempuphu yemithombo yophoko
5 Thululela ilambazi lonke ediweni kumbe eqhageni loba esikalini, vala uyekele okwelanga lonke kumbe kuze kubile
6 Nxa sekubila kubonakala ngamagwetshana exhwathaxhwatha esizaphezulu. Khathesi esenganathwake amahewu kube sekuthandeni kwakho kumbe uwathela itshukela kodwa la amahewu amnandi loba engafakwangwa itshukela.
Ukuze angabimunyu masinyane wagcine endaweni eqandayo enjengokuthambisa isaka libe manzi ugoqele udiwo kumbe isikali, kumbe uhlalise lezizitsha phezu kwetshebetshebe elimanzi nxa njalo ulomaqandisa beka khona amahewu akho.
Lokhu senzela ukuthi angabi munyu aze aphele ukukhwabitheka. Zama lawe uzwe ubumnadi
Indlela yesibili yokwenza amahewu
1 Pheka ilambazi njengedlela yakuqala ulenze libe lula
2 Liyekele liphole sibili
3 Vubela ngemvubelo lezi, ifulawa loba impuphu yemithombo yophoko
4 Ngokunjalo thululela ediyweni, eqhageni kumbe esikalini. Vala uyekele kuze kubile njengendlela yakuqala. Nanzelela ukuthi isikhathi sokuthi kubile singaba side kumbe sibesifitshane lokhu kungayangesandla salo owenze amahewu lawo.
5 Nxa esebilile anathwa njengawakuqala, kusekuthandeni ukuba uwathele itshukela
6 Lawo ungawagcina njengendlela yakuqala
Indlela yesithathu yokwenza amahewu
Nanzelela ukuthi abantu abanengi abasayithandi ngenxa yezizatho ezehlukeneyo
Kungasenani nansi indlela yakhona
1 Khupha indandatho zakho ugeze izandla zakho ngesepa kakhulu. Zihlambulule ngamanzi angelasepa wesule ngelembu elomileyo elihlanzekileyo
2 Thatha isitshwala esisele abantu besidla kumbe okuphakululwe sasala
3 Faka isitshwala lesi emanzini ubususicuba ngezandla ezigeziweyo wenze sibelubudubudu okungamanzi anganatheka
4 Vubela ngemvubelo njengakuqala kumbe okwesibili
5 Thululela ediyweni, esikalini loba eqhageni
6 Linda kuze kubile njengoba wenzile ezindleleni eziphambili. Ukufaka itshukela kusekuthandeni kwakho.
La amahewu nxa uwanatha uhlangana lezigaqana ongazihlafuna, yizo ezenza umehluko njalo zimnadi.
Wonke nje amahewu alokudla okwakha umzimba njalo alula ukuwavuba.
