uMthunywa
Thokozile Mbedzi
INHLANGANISO yeAgritex ikhuthaza abalimi ukuthi bavule imifolo amasimini abo nxa kulamanzi amileyo ukuze izilimo zingaboli.
UMatabeleland North Provincial Agritex Officer uMnumzana Dumisani Nyoni uthe izulu nxa lisina liyabe lilokudla kodwa-ke izilimo zicina zingasakutholi nxa kungaba lamanzi amanengi.
“Nxa kungaba lendawo ezima amanzi ensimini izilimo ezilapho zicina zisiba bomvu ngoba ziyabe zingasatholi ukudla kungakho umlimi kumele avule imifolo ukuze amanzi engami okwesikhathi eside ngoba ebolisa futhi izilimo.
“Kulezondawo kumele njalo kufakwe umvundiso,” kutsho uMnu Nyoni.
Uthe imifolo iyaphathisa kakhulu ukuthi izilimo zithole ukudla ngesikhathi esiqondileyo.
“Lonyaka izulu line kakhulu endaweni ezinengi ngoba izulu elibe khona ledlule isilinganiso se400ml ngenyanga kaZibandlela.
UMnu Nyoni uthe abalimi balakho njalo ukuthi balime imbambayila kanye lendumba ukuze ukudla kube kunengi esiphaleni selizwe lonyaka.
Ekhuluma lentatheli kaMthunywa uMnu Nyoni uthe bakhuthaza kakhulu abalimi abasemahlabathini ukuba balime indumba lembambayila ngoba ziyaphangisa ukuvuthwa.
“Abalimi abasemahlabathini kumele bahlanyele izilimo ezibalisela indumba kanye lembambayila ukuze bengalahlekelwa yinhlanyelo,” kutsho uMnu Nyoni.
Uthe abalimi bangalima izilimo lezi kabasoze balahlekelwe yinhlanyelo yabo.
Uqhubekele phambili esithi abalimi bangalima izilimo lezi kumele baqhubeke bezihlakulela ngoba ukhula lubangela imikhuhlane.
“Kumele abalimi bahlakulele izilimo zabo zonke izikhathi kumbe basuphune ukhula ngezandla ngoba ukhula lwenza imikhuhlane imemethethe masinyane,” kuphetha uMnu Nyoni.
