uMthunywa
Thokozile Mbedzi
Abalimi endaweni zonke nje bakhuthazwa ukuthi baqaphele ama-worms ngoba eyingozi ezifuyweni ngesikhathi sezulu.
Ekhuluma lentatheli kaMthunywa uDokotela wezifuyo eVeterinary Services uPollex Moyo uthe abalimi kumele baqaphele izibungwana ezihlasela izifuyo ngoba zisiba zinengi lazo nxa izulu lingaba linengi.
Uthe abalimi kumele babone ukuthi izifuyo zithola amanzi ahlanzekileyo njalo zinganathi lapho okulamadaka khona ngoba zithola izibungwana lezi endaweni ezifana lalezi.
“Abalimi kumele bananzelele kakhulu izifuyo njalo ngaso sonke isikhathi kumele babone ukuthi zinatha amanzi ahlanzekileyo.
“Kwezinye izikhathi izifuyo zilakho ukuthola amawemusi la emaxhaphozini ngoba zilakho ukunatha lokudla utshani kulezondawo.
“Kumele abalimi bananzelele ukuthi izifuyo zabo kazicikizeki imizimba ngoba lesi yiso isibonakaliso sokuthi isifuyo sesilezibungwana,” kulandisa uDkt Moyo.
Uthe izibungwana lezi zicina zidlela izifuyo ukudla kwazo emathunjini okubangela ukuthi lanxa izifuyo zisidla kungaze kwakhanya ukuthi ziyadla.
Uqhubekele phambili njalo uDkt Moyo wathi abalimi bangabona ukuthi izifuyo zabo zicikizekile kumele bakhangelisise ubulongwe njalo bazise abeVeterinary Services abaseduzane labo ukuze babaphathise.
“Nxa umlimi engananzelela ukuthi isifuyo sakhe sesehlile isisindo kumele azise ababona ngempilakahle yezifuyo ngoba kungenzeka athenge umuthi ongayisiwo ikakhulu nxa engazange abone lutho ebulongweni baso.
“Abalimi kumele babone ukuthi izifuyo zabo kazilali emadakeni ngoba amawemusi la athanda indawo ezimanzi.
Lokhu bangakwenza ngokwenza ezinye izibaya ukuze izifuyo zingalali emadakeni.
“Kuthi labo abanika izifuyo zabo ukudla kumele babone ukuthi baziphela ukudla endaweni ehlanzekileyo ngoba izibungwana lezi zingaba khona,” kuphetha uDkt Moyo.
