Limani lezilimo zokuthengisa

10 Feb, 2017 - 00:02 0 Views

uMthunywa

Francis Dhliwayo
INHLANGANISO ebona ngezokulima eyeAgritex isikhuthaze abalimi endaweni ezitshiyeneyo zelizwe  ukuthi balime ukudla okunengi ukuze benelise ukuthengisa okunye njengoba izulu lililengi lonyaka.

UProvincial Agritex Officer esabelweni seMatabeleland North uMnumzana Dumisani Nyoni uthe abalimi kumele bahlale phansi bahlele okubizwa ngokuthi yi-agricultural planning ukuthi uzalima ukudla okunganani.

“Umlimi munye ngamunye kumele abe lendima yokudla kwemuli yakhe aphinde abe lendima yokuthengisa.

“Lokhu kuzabaphathisa ukuthi bathole inzuzo ezakwenza ukuthi benelise ukuziphilisa lemuli zabo,” kulandisa uMnu Nyoni.

Ekhuluma lentatheli kaMthunywa uMnu Nyoni uthe kuqakathekile njalo ukuthi umlimi abhale phansi imali ayisebenzisayo ngesikhathi elungiselela isikhathi sokulima, elima kanye leyemithi etshiyeneyo ayisebenzisa ukwelapha izilimo nxa zithe zahlaselwa yimikhuhlane.

“Umlimi kumele abe lebhuku lapho abhala khona indleko zakhe zonke; imali yokuthenga inhlanyelo, imali yokulima kanye lemali yemithi.

“Imali yakhe yonke yendleko kumele ayithole ngemva kokuthengisa izilimo ezikundima yakhe yokuthengisa,” kutsho uMnu Nyoni.

UMnu Nyoni uqhubekele phambili esithi abalimi balakho ukulima izilimo ezifana lendumba ezibizwa ngokuthi yi-cow beans, imbambayila, amabele kanye lenyawuthi.

“Kukanti nxa befuna ukulima umumbu kumele balime inhlanyelo ebizwa ngokuthi yi-301 ngoba yiyo ephangisa ukuvuthwa njengoba isikhathi sokuvuna sikhangelelwe emalangeni angamatshumi ayisitshiya galombili (80 days) kukanti inhlanyelo le ebizwa ngokuthi yi-301 ivuthwa ngemva kwamalanga angamatshumi ayisthupha (60 days),” kuchasisa uMnu Nyoni.

Uphethe ngokucebisa abalimi ukuthi isivuno abazasithola kumele senelise ukubaphilisa kuze kufike isikhathi sokuvuna kumnyaka ozayo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds