uMthunywa
Thokozile Mbedzi
ZITHABE zimanzi te izakhamizi zesigabeni seDumbura ngaphansi kwenduna uChireya eGokwe kulandela ukuholiswa umvundiso nguHulumende ngoLwesihlanu ngeviki ephelileyo.
Umvundiso lo ufike kubalimi ngesikhathi esiqondileyo nanko phela izilimo ezinengi lazo besezibomvu ngokutota ngenxa yezulu elinengi.
UMthunywa uvakatshele kule indawo wakhulumisana lezakhamizi zakule indawo ebeziholiswa ifethalayiza zaveza ukujabula kakhulu ngohlelo lukaHulumende lolu.
USobhuku uMnumzana Joel Musarirwa ubike ukuthi uhlelo lolu lubuye ngesikhathi esihle ngoba izulu selilinengi kakhulu kungakho kufunakala ifethalayiza ukuze izilimo zikhule ziye phezulu.
“Ngilokuthokoza okukhulu lamhlanje njengomholi wabantu kulesisigaba ngoba abalimi bebengelayo imali yokuthenga ifethalayiza ngakho sibonga kakhulu uHulumende ngohlelo lolu ngoba izulu line kakhulu izilimo sokumele zithole umvundiso.
“Kungakho-ke nansi isifikile kutsho ukuthi singayifaka emasimini izilimo zethu sezizakhula zizale,” kutsho uSobhuku uMusarirwa.
Esinye isakhamuzi uNkosazana Susan Choga uveze ukuthi bayathaba ngenxa yefethalayiza abayithole ngesikhathi esiqondileyo.
“Siyambonga kakhulu uHulumende ngokusipha umvundiso ngesikhathi esifaneleyo ngoba izilimo zethu beseziyidinga,” kutsho uNkszn Choga.
Uqhubekele phambili ekhalaza ngendleko zokuthwalisa beyisa ezigabeni zabo ngoba imota kazisafiki esigabeni sabo.
“Lanxa ifethalayiza sesiyitholile sibhekane lohlupho lokuthi kwezinye indawo sicina singasatholanga umvundiso ngoba labo abathwalayo bayatshontsha abalimi bacine bengasawatholanga.
Ikhuluma ngaloludaba induna yakulesisigaba uChiya Chireya uveze ukuthokoza ngokuthola ifethalayiza.
“Ngijabule kakhulu ngohlelo lukaHulumende lokuholisa abantu umvundiso ngoba kutsho ukuthi sebezadobhadobha emasimini kodwa kulohlupho sibili lwabantu abatshontshela abanye ifethalayiza yabo,” kutsho induna uChireya.
