Itshaya kuvungame uzulu iDubia Masters

10 Feb, 2017 - 00:02 0 Views
Itshaya kuvungame uzulu iDubia Masters Iqembu leDubai Masters

uMthunywa

INKABI edonsa emfolweni kayikhohlwa bakwethu njalo inyosi kazilibali ukupheka ezimnandi. Kunjalo lakuphephandaba likazulu lihlala liphethe ezinambithekayo kuphela. Angithi kule iviki lize lengqungquthela yeqembu lezomculo we rhumba elingena kunyakaze ngitsho lobunyonyo, umuhlwa ukhithike ezihlahleni.

Leliqembu yiDubia Masters elingena kuvungame uzulu. Kalitshayi nje isiginci leliqembu lenza izimanga. Othanda ukuqumbaqumbeka ngenjabulo kaxhumane lengxoxo enambithekayo phakathi kwentatheli yephephandaba likazulu uCornelius Luphahla (CL) lomqondisi waleliqembu uInterlect Sola (IS).

CL: Uzulu uthanda ukwazi ukuthi wena ungubani njalo yini iDubia Masters?

IS: Mina ngilijaha elakhulela esigabeni seGwambe ePlumtree okuyikho engafunda khona ngaze ngayaqeda izifundo zami zikaFomu 4. Ngemva kwalokho ngaza kweleSouth Africa okuyikho engahlangana khona leqembu leDubia Masters.

Leliqembu lasungulwa nguTumelo Kholwani Dube odabuka sigaba sinye lami kanye loAlfred Sibanda odabuka eLupane. UTumelo yena wayeculela iqembu leNdolwane Super Sounds kuthi uAlfred wayecula loAllen Ndoda kwathi ngo2008 basebesungula leliqembu.

CL: Lokhe lasungula leliqembu selakhipha amadlalade amangaki jahelibanzi?

IS: Lokhe sasungula leliqembu sesakhipha amadlalade amane. Elakuqala salikhupha ngo2010 elithi Uyisithutha esinjani, salandela ngelika2013 elithi Sithuli siyezwa, salandela ngelika2015 elithi Mfuniseni saphetha ngelika2016 elithi Mhlali wazo.

CL: Abantu bathini ngomculo wenu njalo likhangelele ukubenzelani lonyaka?

IS: Abantu bayawuthakazelela kakhulu umsebenzi wethu njalo basikhuthaza ukuthi siqhubekele phambili sibadlalela ingoma zethu ngoba siyabajabulisa. Ngalokhu sikhangelele ukuqhubekela phambili sibadlalela ingoma zethu kuma shows endaweni ezitshiyeneyo. Okunye njalo sikhangelele ukubakhiphela idlalade elitshisayo ngenyanga kaMabasa lonyaka ukuze baqhubekele phambili bejabula.

CL: Livame ukudlalela ngaphi ingoma zenu njengeqembu lezomculo?

IS: Ingoma zethu sivame ukuzidlalela kuma-shows atshiyeneyo kanye lasemidlalweni endaweni ezehlukeneyo. Lokhu sikwenza kweleSouth Africa ngakho sikhangelele ukuvakatshela kwelakithi siyedlalela khona kwezinye insuku.

CL: Bunzima bani eliyake lihlangane labo njengeqembu elidumileyo kwezomculo we rumba?

IS: Ubunzima esiyake sihlangane labo njengeqembu yikuthi abantu kababuyi ngendlela esijabulisayo kuma-shows ethu  ngenxa yokuthi besaba ubugebengu obuvame ukuba khona noma nje thina sivame ukuba lamapholisa amanengi akhangela lokho.

Okunye njalo abanye abantu bathi sincintisana loMartin Sibanda ngenxa yokuthi abanye abaculi baleliqembu baphuma kuqembu leNdolwane. Lokhu kayisikho kodwa thina kasiculeli ukuncintisana lomuntu, sijonge ukufundisa, ukukhuthaza kanye lokujabulisa uzulu.

CL: Nkuthazo bani oyipha abaculi abasakhasa kwezomculo?

IS: Kubaculi abasasungula ngithi kabaqhubekele phambili ngomsebenzi wabo bakhuthale, balaye babuye bafundise uzulu ngempilo. Okunye njalo ngithi kabaqine ngokwenza ama-shows ngoba abantu bayantshontsha umculo okuyikho okungabawisa kwezomculo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds