uMthunywa
Thokozile Mbedzi
ABALANKANI abantu beDumbura, eGokwe ngesiga somntwana ohlala engenwa ngamanalithi lensungulo embaleni yakhe njalonje kodwa kungaziwa ukuthi avela ngaphi ngoba avuka esekhona nje okwenza uyise awakhiphe ngokumsika nge-razor.
Lumntwana oyinkazana oleminyaka yokuzalwa engu-16 uthwele amagabha avuzayo nanko phela uhlala esizwa ubuhlungu njalo sowaze wekela isikolo ngenxa yamanalithi la lensungulo.
Isiga lesi saqala mhlaka 15 Ncwabakazi 2015 kuze kube lalamhla umntwana lo uhlala ehlatshwa ngamanalithi lensungulo.
UMthunywa uvakatshele kule indawo waxoxa labazali balumntwana lezakhamizi zakule indawo.
Ubaba walumntwana uMnumzana Tafi Tshapata (34) uveze ukuthi isiga lesi esehlela umdeni wakhe sibuhlungu njalo sesidide inengi labantu.
UMnu Tshapata uthe kusukela ngomnyaka ka2015 kabuquthi ubuthongo ngenxa yengane yakhe ethwele nzima kusa kwamalanga ngenxa yesiqalekiso lesi. Uthe sebaphelelwa ngamaqhinga njengomdeni ngoba uhlupho lolu solubabhodise amakhanda okweminyaka phose emibili.
“Ngilobunzima obukhulu ngomntwana ngoba ungenwa ngamanalithi embaleni yonke yombili kungakhanyi ukuthi avela ngaphi njalo afakwa ngubani, uzwa ngobuhlungu kuphela esengenile enyameni. Sengizamile esibhedlela kwehlula, ebantwini ngiyahamba kodwa kwake kwangani kuba nganeno sathi siphenduka ekhaya kwaqalisa njalo.
“Amanalithi la isimanga ngesokuthi noma ngingaze ngiwakhiphe ngiwatshise ayabuyela njalo ekhanya ukuthi yiwo abephakathi kwembala yakhe ngoba sikhathi sonke ngiwakhipha ayabe ekhanya etshisiwe.
Kwesinye isikhathi ngiyawabeka phezulu kwenye indawo ngiwabalile noma emahlanu kumbe isitshiya galombili uyathola sokusele eyodwa amanye esebuyele njalo emzimbeni. Ngiyaqunga isibindi ngisike nge-razor besengidonsa ngepintshisi ukuze aphume amanalithi la,” kulandisa uMnu Tshapata.
Umama womntwana uNkosazana Zwamada Mudimu ubike ukuthi sebedidekile ingqondo njalo sebephelelwe yizifuyo abasela lutho ngoba abantu bayabe bebathembisa ukuthi bangaba bhadala bazabalungisela udubo lwabo luphele kodwa kungancedi lutho.
“Sisebunzimeni ngesiqalekiso lesi esingasaziyo ukuthi savela ngaphi. Njengemuli nxa sihamba abanye bathi luhlupho lomdeni kumele sibize abanye abemuli siye enyangeni sisonke kodwa ubuhlungu ngobokuthi abanye bayala sesize sayabikela induna yakithi uChireya.
Sicela usizo kuzulu ngoba asisazi ukuthi senzeni ngoba umntwana kasayi lesikolo ngenxa yamanalithi la amhlaba loba. Usebunzimeni umntanami ngoba uhlala efuthelwa kokuphela,” kulandisa uNkszn Mudimu.
Ibuzwa ngalesisiga induna yakulindawo uChireya ivezele intatheli ukuthi lindaba iliqiniso njalo abazali bomntwana sebelesikhathi eside bambikela ngaloluhlupho. Induna ithe seyaze yathumela amasamanisi kumalunga onke alumdeni ukuze kuhlalwe phansi kuxazululwe ukuthi umntwana angasizwa njani.
“Isiga lesi sesilesikhathi abazali bomtwana bangibikela ngaso kungakho sengithumele amasamanisi kumuli yakoTshapata ukuthi babuye sikhulumisane ngesiga lesi. Uhlupho yikuthi kulokudonselana njalo amanye amalunga emuli kawafuni kuphathisa umntwana ngoba ethi wona ayasonta njalo kawazimiselanga ukuya enyangeni le ethi ingaba phathisa.
“Thina njengezinduna sihlangana lendaba ezifana lale mihla lemihla kuliqiniso ukuthi izinto zesintu lezi yizinto eziphilayo njalo ezidinga ukulungisiswa ngoba abantu bayagangelana ngaso sonke isikhathi,” kuphetha induna uChireya.
