uMthunywa
IZIKHATHI seziguqukile abanye baze bathi kulesimanje njalo kukhona okunye ukudla okhokho ababengakudli, kodwa lamhlanje yikho osekudliwa ngabantu abanengi. Imibhida yayidliwa ngokuthi iphekiwe kuphela kodwa lamuhla isikhona imibhida edliwa iluhlaza. “Okhokho babethi abasimvundla yona edla amahlamvu aluhlaza.”
Lamuhla ngizakuthi fahla fahla ngemihluzi ongayifaka emibhideni eluhlaza engaphekwanga (salad dressings).
Emadilini wonke ayadliwa amasaladi ahlanganiswa lesaladi dressing, lokhu ngumhluzi othize. Lapha ngizakhuluma ngokwenziwa kwe-salad dressing. Zikhona ezithengwayo emavinkilini kuhle lokho, kanti lawe ungazenzela. Nanzi lapha ongazenzela zona ukuze uzifake kumibhida yakho edliwa ingaphekwanga.
1. French Dressing
Okudingakalayo
— ukhezo lokudla olulodwa lwetshukela okuthiwa yi-castor sugar.
— Isawudo ngokhezo lwetiye
— I-mustard yempuphu ngokhezo lwetiye
— I-pepper emhlophe phose kugcwale ukhezo lwetiye ¾
— Amafutha okupheka (cooking oil) ngenkezo zokudla ezintathu
— I-vinegar ngenkezo zokudla ezintathu
— Umganu oyingubhe
— Ukhezo lwesigodo lokuhlanganisa
— Amanzi abilayo ngenkezo zokudla ezimbili kumbe ngokubona kwakho
Ukulungisa i-salad
— Thatha umganu wokuhlanganisela
— Thela itshukela (castor sugar)
— Thela i-vinegar
— Khathesi hlanganisa uthele amanzi abilayo ngesilinganiso sakho
— Thela njalo amafutha (cooking oil)
— Khathesi hlanganisa kuze kuhlangane isibi sibili
— Hlanganisa ubusuthela embodleleni kumbe ejekini
— Yiyo-ke i-salad ozahlanganisa ngayo imibhida eluhlaza engaphekwanga ngayo.
Nanzelela lokhu: Kufanele uyisebenzise iphele mhlalokho.
2. Isaladi dressing nje (ordinary salad dressing)
Okudingakalayo
— amaqanda amathathu
— lakho konke obekudingakala ku-french dressings
— ukhezo lokudla olulodwa lwe-castor sugar
— isawudo ngokhezo lwetiye
— i-mustard yempuphu ngokhezo lwetiye
— amafutha okupheka ngenkezo zokudla ezintathu
— i-vinegar ngenkezo zokudla ezintathu
— umganu wokuhlanganisela ogubhekileyo
— ukhezo lwesigodo lokuhlanganisa
— amanzi abilayo ngenkezo zokudla ezimbili kumbe ngokubona kwakho.
Ukulungisa
— hlanganisa izinto zonke njengaku-french dressing
— bilisa amaqanda amathathu uwenze aqine
— wahlube amaqanda ubusuwahlanganisa ngefologwe
— wahlanganise aze abe luncantshancantsha
— khathesi thatha i-french dressing oyenzileyo uyithele phezulu kwamaqanda ngokunanzelela
— hlanganisa ngokhezo lwesigodo kuhlangane sibili
— le i-dressing nxa usuyihlanganisile izasala ijiyile njalo ibukeka
— ifake embodleleni uyibeke laphaya, ilungele ukufakwa emibhideni engaphekwanga.
— imibhida le ingaba yikhabitshi ilethisi amakherothi amatamatisi njalo njalo.
Nanzelela lokhu: ungayenza i-dressing kufanele uyisebenzise yonke iphele ungayiyekeli ihlale insuku.
Kumnandi ukuzenzela bantu!
