uMthunywa
UNgonyama lemuli yakoNgulube bangena indlela beqonda eMfilabusi. Ngale ngekhaya uMaMsie kwasala kulithuba elihle okwamagama wageza ngokuphazima kwelihlo wayesecwebezela njengoba nje impahla lezi zazimhlala sengathi zazivele zithungelwe kuye. Lwakhala ucingo esebizake uJoza kungakaze kuthini wayesephakathi kweguma likaNgonyama.
Lesi kwakuyisenzo esasiveza ukuswelekala kwenhlonipho kanye lokudelela okuphindiweyo. Umuzi kaNgonyama wayesewungene waze wayaphutsha ngale kwawo. Imvelo lomhlaba kwande ukuba lesijeziso nxa kulezenzo ezifana lalezi, kakusizo izikhathi zonke lapho amaqhalaqhala azithola engaphumelelayo. UMaMsie wayelalo ilungelo lokutshiya uNgonyama ngesehlukaniso esisemthethweni njengoba kucaca wayemthanda uJoza wakhe, kodwa ukhetha khona ukuthi angcolise ngokuphindiweyo umuzi kaNgonyama.
Ngalelolanga koNgonyama kwakukompunzi idla emini. UDavie laye wahle wathola ithuba lokuya huquluza imali esitolo njengoba unina wayengazange alugxobe ngalelolanga. Leyomadlana watshona eyinatha, wabubhudla waze waba yimpuphu. Kambe wayezakhuzwa ngubani, unina wakhona evele laye kungumhlambi kazelusile.
USusie nguye yedwa zwi owayengumuntu kuleliguma nango wazisalela ezikhangelele ingwalo zakhe kazange ake aphume egumeni ngezenzo ezimbi. Wathi nje elokhu ehlezi ezibukelele umabonakude kwaqoqodwa ngendlela engajayelekanga lapha endlini. Weqa uSusie wayavula umnyango lapho athola khona kulepholisa elabuza ukuthi yikho na koNgonyama. Ipholisa lalidinga umuntu omdala lapha ekhaya okuyinto eyethusayo okwamagama.
UGogola weza endlini yokuphumulela laye evele ethuswe yikuqoqoda okungaka. Ipholisa ladinga uNgonyama uGogola walandula ngelithi wayelubhekise esililweni. Wayifunda ivaliwe ngalelolanga. Ipholisa layethula insindabaphenduli yendaba. Laliletha umbiko owawusithi wona uNgonyama ahambe ayebona inkosikazi yakhe isibhedlela seMpilo njengoba yayilimele engozini yemota.
Wababaza okungapheliyo uGogola kuye yayiyinsindabaphenduli yendaba. Imota kaNgonyama yona yayihle yaphela du. UJoza ndini edlephekile nje okungayingaphi. Into yonke ilomvuzo. Kambe indelelo engako yokuhamba ngemota kaNgonyama endaweni zabo zokuzikholisela umnikazi yena evele ehambe ngokubuhlungu.
Esamangele uGogola kwatheleka uDavie laye ethwele umlomo, iyembe inephuzeka, ebona lokhu uGogola wawuhlaba wawuphinda umkhosi ngesimanga esingaka.
