uMthunywa
Siyaqhubeka sikhangela indlela yokukhomba isikhathi esehlukeneyo ngolimi lwesiNdebele.
Isikhathi sebusuku
1. Ekutshoneni kwecelankobe lesi yisikhathi lapho abantu beqala ukungena emagumbini okulala bezilalela.
Icelankobe yinkanyezi etshona sekuhlwile.
(ii) Ukukhala kwenkukhu zakuqala, sekusebusuku sibili.
(iii) Ukukhala kwenkukhu zesibili sekuphakathi kobusuku. Abantu bathi bangaphuma phandle bakhangele umthala bawufice suphendukile.
(iv) Ukukhala kwenkukhu zesithathu, emadabukakusa ekuphumeni kwendonsakusa ezokubuya kwabathakathi. Isikhathi sokubanga ukusa. Ukukhala kwenkukhu nxa sekuhlangana lokuphuma kwenkanyezi okuthiwa yindonsakusa kutsho ukuthi ukuphuma kwelanga sekuseduze.
Lapha sinanzelela ukuthi abadala isikhathi lesi babesibala besebenzisa ukukhala kwenkukhu lokuhamba kwenkanyezi eziziwayo. Umthala uyaphenduka nxa sekuphakathi kwamabili kuthi nxa sekubanga ukusa ube usungezansi kwesibhakabhaka.
Isikhathi kubalwa insuku
Insuku zeviki kulula ukuthi umuntu azikuwe ukuthi zadabuka zibizwa ngayonale indlela na, ikakhulu uMgqibelo, leSonto. Esintwini nxa kubalwa insuku kubuhlungu ngokulandelayo.
1. Kusa kutsho usuku olulandela olwalamuhla.
2. Ngomhlomunye kutsho phambi kwakusasa nxa lamuhla kungemuva ngomhlomunye kungoLweSithathu
3. Izolo kutsho usuku olungemuva kwalamuhla.
4. Kuthange usuku olungemuva kwezolo.
5. Kuthangithangi usuku olungemuva kwakuthangi.
