uMthunywa
YiNtatheli KaMthynywa
INHLANGANISO yeAfrican Union Sports Council Region 5 isibike ukuthi isizatho sokunqotshwa kwamaqembu ezemidlalo emhlubulweni ongezansi yeAfrica sivela ekuthini inkokheli labaqeqetshi abalazithupha zokwenza umsebenzi lo, kutsho uStanley Mutoya.
UMutoya ongumaqhuzu wenhlanganiso le ubike ukuthi sebebophe sinqumo sokuthi bonke abakhokheli bezemidlalo kumele babalezithupha zomsebenzi njengemizamo yokuphakamisa ubungcitshi lenhlonipho kubadlali labakhokheli.
Umaqhuzu weAUSC kulumhlubulo utshele iphephandaba likazulu ukuba sebenanzelele ukuthi banengi abantu abangena ezikhundleni zobuqeqetshi lobukhokheli abazitshela ukuthi balolwazi lwezemidlalo ikanti baqamba amanga.
“Zinengi izizatho ezenza ukuthi amaqembu lamazwe aphuma kumhlubulo wethu ongezansi yeAfrica anqotshwe kokuphela kumincintiswano yaphezulu. Esinye sezizatho lezi yikugcwala kwabakhokheli abangela izithupha ezeneleyo kwezemidlalo. Umhlaba uyaguquka njalo lezemidlalo seziguqukile. Kulezinsuku sekufuneka inkokheli ezilamaphepha.
“Akhona amakhosi ezifundo kuzo zonke inhlanganiso zemidlalo kanye lakunhlanganiso yeSports and Recreation Commission, kumanyivesi ethu, leZimbabwe Olympic Committee kodwa kulabanye abangela thando lokufunda besiyaphambili,” kutsho uMutoya.
Inhlanganiso yeAUSC Region 5 le ngeviki edluleyo ibike njalo ukuthi izaguqula lemithetho yokukhethwa kwabadlali abamela amazwe. Kusukela lonyaka kuzasetshenziswa isikhathi ezivela kumincintiswano yamaOlympics ekukhethweni kwabadlali abancintisayo.
Umbiko kaMutoya ulakho ukutshayisa ngovalo inkokheli zemidlalo kunhlanganiso ezinengi nanko phela akwaziwa ukuthi zangena njani kuzikhundla lezi bengelwazi. Inkokheli labaqeqetshi bemidlalo eZimbabwe bangena esihlalweni ngokuphiwa imisebenzi ngokwazana.
“Njengomzamo wokuthi sidinge amaqhinga wokunqoba, kuzamele sikhuthaze inkokheli ukuthi zithole izithupha zokukhokhela imidlalo. Abaqeqetshi labo sibakhuthaza okufanayo. Kuwo wonke amazwe angaphansi kweAUSC Region 5 sekuzakuba lomthetho omutsha wokuthi abaqeqetshi lenkokheli bathole izithupha ezaneleyo.”
