uMthunywa
YiNtatheli kaMthunywa
OSAZIWAYO labalandeli bomdlalo kanobhutshuzwayo koBulawayo babika ukuthi loba amaWarriors anganqotshwa namuhla, iqembu lesizwe libajabulisile.
Injabulo le ivela ekuthini amaWarriors enelisa ukubamba isizwe seAlgeria 2-2 kumdlalo wabo wakuqala. Kwakungela owayecabangela ukuthi iZimbabwe ingaphuma ilemklomelo engcono kulumdlalo.
Namuhla emini kuvutha inkundla yeStade de Franceville eGabon ngehola lesithupha lapho amaWarriors azangqikilana khona leSenegal.
Lomdlalo lo ubonakala unzima. Kodwa kubalandeli bodumo koBulawayo, ukudibana leSenegal akutsho lutho.
Iphephandaba likazulu lingene ezitaladeni lasemawofisini akoBulawayo lidinga imbono yabasekeli bethimu yesizwe.
UKenneth Mhlophe ongusomabhizimusi owaziwa ngokusekela inguqu kakhulu, ubike ukuba eyakhe imali uyifaka kumaWarriors.
“Mina ngihamba lamaWarriors loba sekutheni. Abafana balethalenta elilakho ukufikisa isizwe lapho okungacabangeli khona abanengi. Ukhangelisisa indlela esidlale ngayo kusukela ngesikhathi sikhankasela ukungena kulinkezo, uzathola ukuthi amaWarriors yithimu okumele ihlonitshwe.
“Silabadlali abazethembayo, njalo ngiyazi ukuthi namuhla nxa sesidlala leSenegal sizakwenza izimanga. Inkuthazo yami yikuthi abantu bakithi abaqhubeke besekela iqembu lethu. Abadlali labo abahlale besazi ukuthi kumele badlalele ukunqoba,” kutsho uMhlophe.
UMhlophe uqhubeke wathi imidlalo ye-Afcon ka2017 le kumele inikeze abadlali ithuba lokuthi bathengwe ngamanye amaqembu.
“Ukudlala kuzinga eliphakeme njengele-Afcon kulithuba elikhulu lokuthi abadlali abenze kuhle babonakale. Yiso isikhathi sokuthi abafana bathengwe.Ngakho ngithi sizayitshaya iSenegal. ”
UDazzy Kapenya owake wabangumdlali wamaWarriors uthe ufisela abafana besizwe inhlanhla yamaswazi. UKapenya wakhokhela amaWarriors nge-Afcon ka2006.
“Ngabukela umdlalo wokuqala ngahle ngabona ukuthi amaWarriors engafinyelela kumahlandla ama-quarter final loba sekutheni.
“Loba sizadlala leSenegal iqembu elesatshwayo, akutshintshi lutho ngoba lathi amanye amathimu asebonile ukuthi siyababa,” ngu Kapenya lo.
Iphephandaba likazulu liphinde laxoxa loDavid Moyo ongomunye wabosaziwayo kwezamabhizimusi abasekela inguqu yabomama.
UMoyo uthe umbono wakhe umfitshane ngoba amaWarriors uwabona esiyaphambili.
“Laphana ku-Afcon sidlula njengesikhukhula. Inkinga yikuthi abafana bethu basuka baqina ngokuvimba endaweni yokuthi bahlohle. Ngethemba umqeqetshi uCallisto Pasuwa uzakutshintsha lokhu mhla sihlasela iSenegal.
“Sizayitshaya iSenegal nxa singenza lokhu esakwenza kuhlandla lakuqala lomdlalo sidlala leAlgeria.”
IZimbabwe ihlasela iSenegal namuhla ntambama andubana iyedlala umdlalo wayo wokucina kuhlandla lequla lika-B ngoLwesibili. Ukunqoba iSenegal kuzatshiya amaWarriors elimiklomelo emine, okuyikhona okuzavusa amathuba okuphumelela.
