uMthunywa
kuloba uCornelius Luphahla
BAKAMALANDELA kule iviki ngithe sike sijule kancane ngokuveza indoda uqobo emphakathini kanye lokuthi nxa indoda isilela ebudodeni izame macebo bani. Yiyo-ke injongo nsika esizancokola ngayo kule iviki.
Angithi nje indoda iqala ngokuba lijaha ikhule ize iyefika ebudodeni uqobo. Kunjalo-ke ekadeni ijaha lalidunduzelwa ngesikhathi lithomba ngenhloso yokuliqinisa.
Ijaha elipheleleyo lalingahlali amalanga aze abe mahlanu lingazange lakhuhluzela amasi alo engutsheni zalo. Lokhu kwakuchaza sobala ukuthi yindoda sibili engeke yakhathaliswa ngumuzi wayo. Kwesinye isikhathi ijaha lalingakhuhluza amasi la kabili kumbe kathathu ngeviki. Kwakuthi kungaba njalo amakhehla alikhuthaze ngokuthi selingathatha ngoba kukhanya ukuthi libukhali kakhulu.
Kulezinsuku amajaha kawasakwazi ngitsho lokuthi kulento okuthiwa yimbiza. Abanye sebekuzwa ngelika bathi kodwa kabakholwa lokuthi yinto eyake yaphila. Angithi nje ijaha ngokwalo nxa lithe ladlula ligudla intombi kumbe lithe layixhawula kufanele isale isizwa umzimba wayo ungathi uyethuka kancane nje izwe kungathi kukhona ukuyihambayo emzimbeni.
Yikho-ke okudala ukuthi imizi yamadoda akulezinsuku ihlale ixega ngoba ubudoda abusekho kulezinsuku. Indoda angithi nje kufanele ukuthi nxa ithe yaphathaphatha owangakwayo kuthi kusiya kusa ekuseni abonakale ngokuvuka ethanyela ehlabela ingoma ezwakala ukuthi iyamjabulisa. Lapho-ke kuyabe kusobala ukuthi inina leli lijabule kwaze kwajula enhliziyweni yalo.
Kwakuthi nxa uyindoda ubona ukuthi kuyala ukuba umjabulise umkakho uzame amanye amacebo angakusiza ukuze umkakho angaze waphumela ngaphandle. Lapha-ke kudingeka izihlahla ezithile ukuze indoda iqinise iqolo.
Nxa kunjalo indoda ikhuthazwa ukuthi ithathe impande zomtshibi omduna, ezomphaphama, ezomvusankunzi, ezenofi enduna, ezikamatshisa, ezomnonjwana kanye lezinye engingeke ngazibetha kuzulu azihlanganize.
Ekuzihlanganiseni kwakhe lapha uyazifaka eguleni okwamalanga amabili ezikhuhluza.
Ngelanga lesibili ekuseni indoda ingakadli lutho iyathatha igula leli ilikhuhluze qede inathe umhluzi lo. Lokhu izakwenza emini lantambama kodwa ngesikhathi ingakadli. Ngokwenza lokhu izihlahla lezi zizancedisa ukugezisa igazi zivule imthambo yendoda.
Kusiyatshona ilanga indoda izabe isisizwa ukuthi umzimba wayo usuguqukile kancane. Ingakwenza lokhu okwamalanga lize liphele leligula. Ungabona indoda ilinatha leligula okwamalanga ambalwa lapho umkayo uyabe esehlala ethi uyagula ngoba izabe siyindoda uqobo. Ngalokhu kufanele ukuthi igula leli indoda ilinathe iseqisa insuku kumbe ihlale amalanga ambalwa ingalibambi.
Indoda elembiza le ngeke yahlala ixabana lomkayo ngoba uyabe ehlala ezisuthele umntanabantu. Kambe ngubani owake wabona umntwana osuthayo ehlala ekhala? Kunjalo-ke lasezindlini lapha, kuqakathekile ukuthi kungaphilwa ngendlala.
Mlobi ngithemba uphilile. Ngithanda ukubonga umsebenzi lo osenzele wona. Mina isicelo sami yikuthi ngazi ukuthi ngingenzani ukuze ngikhulise isitho sami ngoba sincane kakhulu ngakho umkami uyakhonona kakhulu okokuthi sengingachithekelwa ngumtshado. Jabulani Nkomo, Lupane.
Siyabonga ukusikhuthaza kwakho ngezamasiko ngakho sithi iphephandaba likazulu kaliqhubekele phambili ngomsebenzi lo omuhle. Isicelo sami yikuthi ukhuthaze kakhulu abesilisa ukuthi baphathe njani imizi yabo kugoqela ukutshengisa uthando kanye lokujabulisa omkabo ngakho konke. Sibonokuhle Dube, Cowdray Park, Bulawayo.
Mina ngithanda ukubonga umsebenzi lo owenzayo, isicelo sethu yikuthi usichazele indlela amantombazana lamajaha ayekhuliswa ngayo ukuze abe lesithunzi kubomkabo. Sithandazile Mpofu, Manomano, Nkayi.
Mlobi, ngithanda ukuncoma umsebenzi owenzayo njalo ngicela ungichazele indlela engingathusa ngayo inkomo zami ukuze zingadliwa yizibanda. Innocent Tshuma, Hwange.
Thintana lomlobi ku-WhatsApp utsho umbono wakho ku-0737771317 kumbe ufone ku-0775722298.
