uMthunywa
Ncekwenhle Ncube
ABABONA ngezokulima bakhuthaza abalimi ukuthi bavikele izilimo zabo ekuhlaselweni yizinanakazana eziyingozi ngokwenza ama-fireguards.
Omunye umlimisi weAgritex uMnumzana Khumbulani Sibanda ubikele intatheli ukuthi ngezikhathi lapho izulu lilinengi abalimi kumele baqaphele ama-worms ngoba yikho lapho asebenza khona ngamandla.
Uthe abalimi kumele bavule ama-fireguards begqagqele insimu zabo ukuze bavikele izilimo zabo. Ama-fireguards lawa kumele abeyi-2 kusiya ku-3 meters ububanzi.
“Abalimi balomlandu wokulima ukudla okuzangena esiphaleni selizwe yikho sibakhuthaza ukuthi bavikele izilimo zabo kuzibungwana ezilakho ukwehlisa isivuno sabo.
“Izibungu ezifana lama-chilo worms le-army worms kumele zenqatshelwe ekutshabalaliseni isivuno salomnyaka.
Abalimi kumele bebone ukuthi insimu zabo zivikeliwe ekumemethekeni kwezibungwana lezi,” kutsho uMnu Sibanda.
Kubikwa izibungwana lezi zihlasela izilimo ikakhulu umumbu ngesikhathi ulamahlamvu amathathu kusiya phezulu.
Abazingcitshi kwezokulima baphawule ukuthi nxa ama-worms la enganqatshelwanga alakho ukwehlisa isivuno somnyaka nge50%. Okuchaza ukuthi ayingozi kakhulu yikho nje kumele avikelwe.
Ngaphandle kokusebenzisa ama-fireguards abalimi bakhuthazwa ukuthi nxa izilimo zabo sezihlaselwe yizibungwana lezi basebenzise imithi efana le-karate zeon, blast super le-bulldock.
Abalimi bayakhuthazwa ukuthi nxa belima kuhle ukuthi batshitshantshanise izilimo zabo. Lokhu kwenza amaworms angathi ngokuphambanisa indlela aphila ngayo.
Abalimi bayaqoqonselwa ukuthi bakwenze lokhu ngoba inengi labo kade layilahla indlela le yokuvikela izilimo zabo.
