uMthunywa
Thokozile Mbedzi
ABALIMI baxwayiswa ukuba bavikele inkomo zabo njengoba izulu lilinengi lonyaka kukanti njalo livame ukubuya lemikhuhlane.
UDokotela wezifuyo eVeterinary Services uMbuso Moyo uveze ukuthi ngesikhathi sezulu kuqhamuka imikhuhlane eminengi ezifuyweni.
UDkt Moyo uthe abalimi kumele baqaphele inkomo zabo ngoba zilakho ukuhlaselwa yimikhuhlane etshiyeneyo ebalisa owegazi, owamathambo kanye lomkhono.
“Abalimi kumele bathenge imithi yokuthi bahlabe inkomo zabo kusesemasinya ukuze zivikeleke ikakhulu kumikhuhlane le ebaluhlupho ngesikhathi lesi sezulu.
“Abalimi akumelanga balindele ukuthi inkomo ziqale zigule ukuthi baqalise ukuzihlaba,” kutsho uDkt Moyo.
“Sicebisa abalimi ukuthi nxa kulomkhuhlane kumbe kukhona abangakuzwisisiyo baphange bazise abeVerterinary Services abaseduzane labo ukuze zihlolwe zingakaguli kakhulu okungenza bacine belahlekelwa zinkomo zabo.
UDkt Moyo wengezelele ngokukhuthaza abalimi ukuthi badibhise inkomo zabo maviki wonke.
“Silebhuku elibizwa ngokuthi yi-stock record register elibhalwa maviki wonke lokhu kuncedisa ukuthi inkomo zibe lempilakahle ekhangelelweyo elizweni.
“Abalimi be-commercial yibo abazithengela idibha kodwa labo siyabacebisa ukuba bavikele inkomo njalo bazise abeVerterinary nxa sokuqhamuke umkhuhlane loba inkomo zabo zigula.
Uthe abalimi bangalandela izixwayiso abaziphiwayo kuyabasiza ukuthi inkomo zabo ziphangise ukuzala.
“Ukulandela izixwayiso kuyasiza abalimi kakhulu ngoba kwenza ukuthi babe lenzuzo nanko phela inkomo zabo ziba lempilakahle okwenza lanxa bezithengisa bazithengise ngemali ephezulu,” kutsho uDkt Moyo.
Uphethe ngokucebisa abalimi ukuthi inkomo zabo zingahlali edakeni ngoba ziyadabuka amasondo zicine zilimala.
