uMthunywa
Ncekwenhle Ncube
ABALIMI beStanmore kanye leLumene eGwanda bakhala ngezifuyo zabo ikakhulu inkomo esezihlaselwa yimikhaza lokhe kwaqala ukuhluma utshani.
Kubikwa amankomokazi amanengi asefelwe yimbele ngenxa yemikhaza kule indawo.
Esinye isakhamuzi seStanmore uNkosikazi Catrinne Ndlovu sibikele intatheli ukuthi nkomo ezilhutshwa kakhulu yimikhaza ngezinsikazi. Imikhaza le ithanda indawo ezibuthakathaka ikakhulu emabeleni.
“Amankomokazi yiwo ahlaselwa yimikhaza esikhathini esinengi. Imikhaza le iba yingozi kakhulu ngoba idla imbele.
Ngikhuluma nje kulenye eyami elebele ekhanya isifelwe yimbele emithathu okutsho ukuthi isizamunyisa ibele elilodwa.
“Sicela ukuthi uhulumende asincedise lapho enelisa khona ngemithi yokudibhisa ukuze senelise ukudibhisa izifuyo zethu maviki wonke,” kukhalaza uNkskz Ndlovu
UMnumzana Colleen Moyo laye oyisakhamuzi sakule indawo uchaze ukuthi isikhathi semikhaza sesiqalile sibili njalo izifuyo ziyahlaselwa.
“Nxa sokuluhlaza izifuyo ziyakholisa sibili kodwa zithwala nzima ngoba yiso isikhathi semikhaza.
“Okwakhathesi inkomo zidijiswa kanye ngemva kwamaviki amabili kodwa kungathi kuyasilela. Ezami sengisenza okukuthi ngizidibhise ngekhaya nxa ngingabona sezibanjwe yimikhaza le.
“Ngizwela kakhulu amankomokazi amithiyo ngoba yiwo acina sefelwa ngamathole nxa engazala ngoba ayabe esevaleke imbele ngenxa yemikhaza,” kulandisa uMnu Moyo
Kubikwa inengi labantu kulo umhlubulo abasasengi inkomo zabo ngoba izifuyo zabo sezimunyisa imbele embili kumbe owodwa.
UDokotela wezifuyo uPollex Moyo ukhuthaze abalimi ukuthi badibhise izufuyo zabo phose maviki wonke ukuze zingahlutshwa yimikhaza.
“Wonke umlimi ulomlandu wokubona ukuthi izifuyo zakhe ziphephile emikhazeni. Kumele babone ukuthi bayazidibhsa nxa zidijiswa ezabanye kanti njalo kumele babe lemithi eqondene labo eyokugcoba izifuyo zabo ukuze zingahlutshwa yimikhaza,” kuphetha uDkt Moyo.
