Ukuqakatheka kukagogo lobabamkhulu abazala umama

13 Jan, 2017 - 18:01 0 Views

uMthunywa

Pumulani Mpofu

Ekukhuleni kwethu izikhathi ezinengi sasisuka sibaleke kumama siqonde kugogo  lokhulu ngoba sisazi ukubana bayasivikela lapho omama befuna ukusitshaya njalo basinakekela ngcono nxa umama lobaba bengekho.

Izikhathi ezinengi lapho umama esethe wadlula emhlabeni abantwana banakekelwa ngugogo ozala umama.

Ekubhubheni kwabazali kubakhona ingxabano lapho sokudonselwana ngokubana abantwana bazathiwani. Ingxoxo ezinengi engibalazo lozulu zingitshengisa ukubana ugogo lokhulu baqakathekile ezimpilweni zethu laloba sesizintandane.

Kule iviki ngithole ithuba lokuxoxisana logogo okuthiwa nguZondiwe Mdlongwa kanye lexhegu lakhe okuthiwa nguSamson  Mwale. Ugogo lokhulu lo batshonelwa yindondakazi yabo ethiwa nguSihle Mwale. USihle watshiya indodakazi yakhe eyodwa uUnathi Mpofu. Uyise kaUnathi, uJoe Mpofu nguye owasala ephila. U-Unathi wasala egcinwe ngugogo wakhe lobabamkhulu abazala unina. UMpofu kakumphathanga kuhle lokhu njalo  wazama ngazo zonke indlela ukubana athole indodakazi yakhe kodwa esehluleka ngoba abadala bemtshela ukubana yena ungowesilisa ngeke akhulise indodakazi yakhe ngendlela elohlonzi ngakho kulungile ukubana ikhulise ngoyisemkhulu yena ulakho ukuza ezombona izikhathi zonke.

Loludaba alumphathanga kuhle ngoba yena ezifunela ukubana azigcinele indodakazi yakhe eGoli. UMpofu wadinga amaqhinga okuzuza indodakazi yakhe. Wanyenya wafika watshontsha uUnathi, incwadi yakhe yokuzalwa kanye lencwadi yokufa kukanina.  UMpofu loUnathi baqonda  elizweni laseSouth Africa. Ugogo lobabamkhulu bakaUnathi babika emapholiseni ukubana umzukulu wabo setshontshiwe. Kwagijinyiswana baqonda emapholiseni  kanye lasenkantolo kwaze kwacina sokuthiwa umntwana kahanjiswe agcinwe ngugogo lokhulu ukuze akhule ngcono kodwa-ke uyise ulelungelo lokuvakatshela indodakazi yakhe loba nini.

Emva kokwahlulelwa enkantolo uMpofu wasuka-ke wahamba lencwadi yokuzalwa komntwana wahle wahamba waphulula.  Ugogo lokhulu bafika eTrinity bezodinga uncedo lokubana bangenza njani ukubana umzukulu wabo uUnathi athole incwadi zokuzalwa. Okwakukuhle ngabo yikubana babele-photocopy. Kumele babe lemali engange $5 baqonde emahofisini  akoMsitheli. Bahamba koMsitheli bephethe njalo incwadi yemthethwandaba bafika-ke bamzwisisa bamkhangelela incwadi yokuzalwa kuka-Unathi kukhompuyutha bambhadalisa i$5.

Lakanye bayithola incwadi kaUnathi yokuzalwa. Ngiloba nje ugogo lokhulu balilwela ilungelo likaUnathi wacina eselalo. Lokhu kuveza sobala ukubana ugogo lokhulu balakho ukugcina umzukulu njalo bamlungisele ilungelo lakhe lokwaziwa.

Asihlanganeni njalo kuviki ezayo.

Umlobi utholakala kunombolo zocingo ezithi 0773195055 lakukheli elithi [email protected].

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds