Yayivalwa intombi ekhule masinya

17 Jan, 2017 - 18:01 0 Views

uMthunywa

kuloba uCornelius Luphahla

MTHWAKAZI kaNdaba, kule iviki ngithi sike sincokole kancane ngendaba zasendulo ezokukhuliswa kuhle kwentsha ikakhulu amantombazana. Lapha sizathinta kakhulu ngesizatho sokuthi kungani endulo kwakuyinhlaka yotshani ukuthi uthole kuthiwa intombi esasencane izithwele kumbe ilomntwana.

Lokhu kwakungenxa yokuthi yayikhona imigilingwana eyayisenziwa ngenhloso yokuvala amanyala la.

Ayengamanyala sibili endulo kodwa khathesi amantombazana sekubona njengento engamangalisiyo. Lokhu kungenxa yokuthi isizwe saMaNtungwa sesaphenduka intundu kaSobukhazi eyabonwa ngoMandulo.

Angithi nje ukuvalwa kwentombi ukuthi ingaze yakhula masinya kwakuyindlela yokuyivikela ezilweni ezingamajaha ukuthi zingaze zayihahabela isasencane ingakabi kwazi ukwehlukanisa okuhle lokubi? Pho kulezinsuku njengoba kungasekho lokhu angithi nje amajaha ahle ayisukele. Angavela abone iphuhlambonjwana liyabe liluthezile olulenkume.

Lapho-ke amajaha abhuza okwenyoni mhla intenjane ivuthiwe. Umntanabantu njengoba uyabe ebona angani ukubhuza kwamajaha kudalwa yikuthi wabunjwa ngesineke, laye lapho uzawakhongozela ngezandla zonke ivuthwe indlela eya kwabo kodwa isiphetho sosiba yikubhebha.

Yebo kambe umntwana uyabe engelacala kodwa uzalimuka esezithwele kwesinye isikhathi angakuboni lokuthi usezithwele njengoba uyabe engazi lutho. Lapha-ke nxa sokuvele isiga esinje angithi icala likumzali lemajaheni nje?

Kumzali icala ngelokuthi uyabe esazi ukuthi intombi ingamane iphuhle kubonakale lamahlalo ihle iphenduke umbizabiza emajaheni.

Nxa kunjalo-ke kubalulekile ukuthi umzali afundise umntanakhe ngendlela yokuziphatha kuhle njengalokhu okwakusenzakala endulo. Angithi ekadeni kwakuthi nxa intombi isinjalo izalukazi zihle ziyihlalele kusa kwamalanga ziyifundisa ngendlela okufanele iziphathe ngayo. Zazithi mhla ziyidunduzela sezibonile ukuthi ngempela isikhulile emqondweni. Yikho-ke okwakusukela khona ukuthi intombi ekhule masinyane ivalwe ukuya ezibukweni ibuye ithanyelwe lamabele.

Kwakunjalo endulo kubuswa kudelwa kungekho abantwana abangela boyise njengalokhu osokuyinsamvukela umchilo wesidwaba. Intombi ekhule masinya yayithathwa yisalukazi siye layo ngemuva kweziphala okuyikho esasiyithamela khona. Lapho-ke sizathatha impande zesihlahla somqokolo, ezenhlokitshiyane lezikamabophe obomvu lezezinye izihlahla ezintathu engingeke ngazibalisa kuhlanganiswe kuxhwathise ngodiwo olungakaze lupheke.

Ekuxhwathisweni kwempande lezi kubaswa umlilo ngenkunyana zomqokolo lezomgugudu. Umhluzi lowana siyawuthatha njalo isalukazi sipheke ilambazi ngempuphu yezimba lemfe kumbe eyophoko. Ilambazi leli intombi izalidla ngezandla zonke kodwa isebenzisa iminwe emithathu ucikilicane leminye elandelayo emibili.

Ekudleni lapha ikhuthazwa ukuthi iliqede kodwa akuvamanga ukuthi iliqede ngoba liyatshaqa. Eliseleyo isalukazi siyalithatha ngodiwo lolu siye ngaphansi kwesiphala sifike simbokothe udiwo lolu khonapho lelambazi lakhona qede siqonde emkulwini singanyemukuli.

Intombi layo izasuka ngemuva kwesiphala iqonde emkulwini inganyemukulanga. Ngalokhu umkhuba wokuyivala ukukhula uyabe usuphelile. Kwesinye isikhathi abanye bahle bayithanyele amabele ukuthi abuyele phakathi.

Amabele la athanyelwa ngumntwana omncane olijaha kusekuseni ilanga lingakaphumi kumbe isalukazi okuyiso esikhangela ngokusentshenzwa kwentombi le.

Intombi le iyavuswa ekuseni imiswe phambili komkulu kumbe kwesiphala inqunu phezulu. Umfanyana lo uyabuya engakagezi amehlo afike athanyele amabele entombi le qede alahlele umthanyelo phansi aqonde exhibeni lakhe anganyemukuli lentombi izaqonda kwelayo ngokufanayo. Nxa kuyisalukazi laso senza ngendlela efanayo lapho uyabe usuqhutshwe waphela umkhuba lo.
Mlobi ngithemba uphilile. Mina ngithanda ukuncoma kakhulu imfundiso osipha yona kwezamasiko kanye lezenhlalo yasendulo. Okungijabulisa kakhulu yikuthi ngathola usizo ngomthuso wokuhlanganisa izifuyo zami  okwamanje ngikhuluma nje sezihamba ndawonye njalo lengizithengayo kazibuyeli lapho engazithenga khona ngenxa yolwazi engaluthola kuwe. Ngalokhu ngithi qhubekela phambili ngomsebenzi lo owenzayo. Thubelihle Mpofu, Nkayi.
Siyabonga kakhulu mlobi umsebenzi lo osenzela wona. Mina ngibonga imfundiso owayichathekela uzulu ngokuthi amadoda aqinise njani imizi yawo ngoba lami ngangilohlupho olunjalo lomkami sengize ngifuna ukuganga kodwa khathesi sengikhululekile, umkami sekwazi ukungijabulisa. Sithembile Mathe, Pumula South.
Mlobi mina ngithanda ukubonga umsebenzi osenzela wona kodwa ngicela ukuba usilobele ngokuthuswa kwenkomo ukuze zingadliwa yizibanda ngoba udaba lolu ngalukhutha. Sikhosana, Tsholotsho.
Mlobi ngiyabonga umsebenzi wakho owenzayo ngithi qhubekela phambili uvusa ubuzwe bethu ngoba intsha yanamuhla isitshabalele. Mina ngithanda ukwazi ngokuthuthubeza amajaha ukuthi angaze athanda amantombazana kakhulu kanye lamantombazana ukuthi angaze athanda amajaha kakhulu. Delwayo Nkomo, Ntepe, Gwanda.
Ungaxhumana lomlobi ku 0775722298 kumbe i-whatsapp ku 0737771317.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds