uMthunywa
Cornelius Luphahla
Umculo kamaskandi oyiwo insika yakoMthwakazi ukhanya uqhubekela phambili usanda nanko phela iqembu laMafik’ amahle elidabuka kwelePlumtree selipheke iDVD yomhlaba.
Leliqembu likhiphe iDVD yedlalade layo elithi UNgungunyana, ekupheleni kwenyanga ephelileyo ngenhloso yokuqhubekela phambili lijabulisa umphakathi ngengoma zalo.
UMthunywa uxhumane lomholi waleliqembu uKhayelihle Sibanda uthe iDVD le ilengoma ezilitshumi njalo bathembisa ukuqhubekela phambili bejabulisa uzulu babuye bakhiphe elinye idlalade.
“I-DVD lethu silikhiphe ekupheleni kwenyanga ephelileyo njalo ngeyedlalade lethu lika2015 elithi UNgungunyana.
Lelidlalade lilengoma ezilitshumi ngakho lakuDVD lethu kulengoma ezilitshumi. Lokhu sikwenzele ukuthi uzulu azibonele ngamehlo umsebenzi esiwenzayo.
“Ngalokhu-ke sikhangelele ukuqhubekela phambili sijabulisa uzulu sisakaze iDVD lethu endaweni ezehlukeneyo ukuze wonke umuntu awuthole umculo wethu. Lonyaka sikhangelele ukupheka elinye njalo imbabazane yedlalade,” kutsho uKhayelihle Sibanda.
Ekhuluma lentatheli uMqondisi waleliqembu uXolani Tshuma ubikele intatheli ukuthi iDVD le abalikhuphileyo ngeyakuqala njalo bathembisa uzulu ukuqhubekela phambili bemkhiphela amanye babuye bavakatshele indawo ezehlukeneyo betshaya ingoma zabo.
“I-DVD le ngeyakuqala njalo siyajabula ngoba abantu bayayincoma kakhulu. Sikhuthaza uzulu ukuthi aqhubekele phambili ngokusisekela ngoba lathi sizaqhubekela phambili simphekela uluju lwendlebe ukuze ahlale ejabula ngomculo wethu.
“Okunye njalo sisazovakatshela lakwelakithi koMthwakazi siyejabulisa uzulu ngengoma zethu ngokumenzela ama-shows kanye lokuvakatshela indawo ezehlukeneyo sizwisa abantu umculo wethu,” kutsho uTshuma.
