uMthunywa
NJENGOBA abadala bethi inkabi endala idonsa emfolweni njalo igula elidala livame ukunuka amasi, nanku kugcwaliseka ngephephandaba likazulu eselize lezinye njalo indaba ezimnandi njengenhlalayenza. Angithi nje kule iviki liye layafukula ingadlangadla yeqembu lomculo wezokholo elingena kuphume amadimoni ebantwini.
Kambe iqembu elinandisa kangaka kungaba yiliphi ngaphandle kwelaManguni Wengoma eliphethe ingilosi zamantombazana lamajaha mdabuko. Kaliculi nje leliqembu ingilosi yezulu ingumfana. Othanda ukugcwala umoya ongcwele kule iviki kahlangane lengxoxo ebusisekileyo njalo enambithekayo phakathi kwentatheli yephephandaba likazulu uCornelius Luphahla (CL) kanye lomunye wamalunga aleliqembu uConstance Dumani (CD).
CL: Akutsho ntombenhle mayelana lembali yeqembu lenu lokusungulwa kwalo?
CD: Mina ngakhulela esigabeni sakoMavumela ePlumtree okuyikho engisuke khona ngazodinga umsebenzi kweleSouth Africa ngemva kokuqeda kwami izifundo ze-secondary. Njengomuntu okhonza kubandla leTwelve Apostolic Church of Christ ngahlangana lamanye amalunga aleliqembu saqala sisacula ebandleni nje siku-choir.
Kuthe ngemva kokunanzelela ukuthi siyenelisa ukucula kuhle sabona kungcono ukuthi sisungule iqembu lethu.
Yikho-ke ngo2016 sasesisungula leliqembu ngenhloso yokujabulisa uzulu ngengoma zokholo. Ekulisunguleni kwethu singamaqembu alitshumi agoqela mina, uMercedes Thabo Vundla, uMqhamuki Mpofu, uThemba Moyo, uPraise Ndlovu, uBahle Mpofu, uThabisile Mpofu, uNqobile Dumani, uSetty Moyo kanye loBest Dube.
CL: Njengeqembu elisasungula selakhipha amadlalade amangaki lokhe lalisungulayo?
CD: Lokhe sasungula leliqembu sesakhipha idlalade elilodwa elithi Isiphofu seJericho njalo silikhiphe ngo2016 okuyikho esisungule khona iqembu lethu.
CL: Abantu bathini ngomculo wenu njalo likhangelele ukwenzelani uzulu lonyaka?
CD: Abantu bayawuthokozela kakhulu umculo wethu njalo basikhuthaza ukuthi siqhubekele phambili sibajabulisa ngengoma zethu singadeli. Ngalokhu-ke sikhangelele ukubakhiphela elinye idlalade elitshisayo sibuye njalo sibaphekele i-DVD eminyakeni ezayo ukuze labangasaziyo basibone.
CL: Landise ukutshayela ngaphi ingoma zenu lijabulisa abalandeli benu?
CD: Ingoma zethu njengeqembu sivame ukuzidlalela emikhosini emikhulu enkonzweni kanye lakuma-shows.
Sikhululekile njalo ukuthi simenywe emitshadweni kanye lakweminye imikhosi etshiyeneyo.
CL: Bunzima bani eliyake lihlangane labo njengabaculi njalo nkuthazo bani eliyipha abaculi abasasungula?
CD: Ubunzima esiyake sihlangane labo njengabaculi yikuthi njengeqembu elisasungula sisaswela imali yokuzithuthukisa kwezomculo njalo abantu bayasintshontshela umculo wethu bawuthengise ngentengo ephansi okudala ukuthi nxa sesiwuthengisa bengawuthengi ngoba sebejwayele otshiphileyo.
Kubaculi abasasungula ngithi kababambelele bengadeli noma behlangana lobunzima. Okunye njalo ngithi kabahloniphe umphakathi ukuze bathuthuke bathole usekelo.
