uMthunywa
Thokozile Mbedzi
ABALIMI esigabeni seMashava eMasvingo bakhathazekile kakhulu kulandela ukuqhamuka kwemihogoyi esihlasele izilimo zabo nanko phela lokhu kulakho ukwehlisa isivuno sabo.
Kubikwa imihogoyi le iqhamuke kule indawo kumaviki amathathu adluleyo njalo isihlasele indawo enkulu kakhulu.
Ekhuluma lentatheli kaMthunywa uMnumzana Elias Muhawu uthe ubudli lobu sobubathwalise nzima njalo ngeke babe besathola isivuno akade besikhangelele nxa bengasatholanga imithi yokuqeda ubudli lobu.
“Izilimo zethu sezihlaselwe yimihigoyi kule indawo. Amahlamvu omumbu asedliwe wonke aphela du, njalo izilimo lesi ukuze ubhaceke kumele kube lamahlamvu ngoba yiwo alempilo yomumbu.
“Sididekile njengabalimi ngoba asizazi indlela zokwenqabela ukumemetheka kwemihogoyi ngoba kayilindeki njalo kayigoleki ngoba kuyizibungu ezisabalala insimu yonke umlimi aswele lokuthi abambe ngaphi,” kutsho uMnu Mahawu.
UNkosazana Sukoluhle Nkomo laye ongumlimi ugcizelele wathi izilimo zabo sezifile ngenxa yemihogoyi le esigcwele emasimini abo.
UMthunywa uxhumane loNkosazana Vonayi Hove ongumlimisi kule indawo wathi sebewamukele umbiko wokuhlaselwa kwezilimo yimihogoyi.
“Samukele umbiko ovela kubalimi ngemihogoyi esiqhamuke kule indawo. Sikhuthaza uzulu ukuba azame ngawo wonke amandla ukuthenga imithi efafazwayo kuzilimo ukuze imihogoyi le ife.
“Imithi le ibalisa i-Bulldox, Coragane le-Karapezeone. Abalimi nxa bengathola omunye wale imithi balakho ukuwusebenzisa ukubulala imihogoyi le.
UNkszn Hove ugcizelele wathi imihogoyi iyimihlobo emithathu ebalisela i-armyworm, fallworm lechiloworm.
I-armyworm yiyo ehlasela kakhulu izilimo zisasezincane kuthi i-fallworm le-chiloworm zihlasela lanxa izilimo sezikhulile.
“Abalimi kumele baphange bazise abalimisi abasezigabeni zabo ukuze bathole usizo isivuno singehli.
Uphethe ngokukhuthaza abalimi ukuthi bangavilaphi ukuhlakulela izilimo zabo.
“Abalimi kumele bahlakulele izilimo zabo ngoba ukhula lulakho ukuphambanisa izilimo njalo lokumemethekisa ubudli obufana lemihogoyi,” kuphetha uNkszn Hove.
