uMthunywa
Kudala kwakungeke kube leKhisimusi lomnyaka omutsha ingalalanga ngophondo inkomo kumbe imbuzi. Zedlula-ke lezonsuku, lamhla akusenjalo sekunzima ukuthi izifuyo ezinjengalezi zilale ngophondo ngoba phela zivele sezisilela abantwini.
Kodwa-ke bakhona abambalwa abasakwenza lokhu. Nanku-ke osekuyisitshebo seKhisimusi lomnyaka omutsha ebantwini abanengi. Ngitsho inkukhu phela. Ziyadliwa bantu inkukhu ngesikhathi lesi njalo abantu abanengi bayazifuyela inkukhu kuthi abanye bazithenge emakethe loba kwabanye abazifuyileyo.
Lapha ngizakuthi fahlafahla ngokuphekwa kwenkukhu okubili.
Inkukhu echochonjisiweyo
Okudingakalayo
– inkukhu elungisiweyo eyodwa
– isawudo le-pepper
– amafutha okuphekisa
– ihanyanisi ezimbili
– amatamatisi amathathu
– igabha kumbe umganu wokuchochombisela
– i-oven etshisa okuyi 325-350 degrees
Ukupheka
1. Gezisa inkukhu phakathi wesule ngelembu elimanzi.
2. Quma inyawo zayo uqume lentamo.
3. Vuvuzela isawudo le-pepper phakathi langaphandle
4. Vuvuzela amafutha alingeneyo phakathi kwenkukhu.
5. Ilalise ngomhlubulo egabheni lokuchochombisela elilamafutha.
6. Vala igabha kumbe umnganu nxa ulesivalo.
7. Nxa isivalo singekho gxamuza ilembu okuthiwa yi-cheese cloth emafutheni alingeneyo wembese inkukhu yakho.
8. Faka igabha ku-oven etshisayo, yekela okwemizuzu engu-30.
9. Ngokunjalo qoba ihanyanisi lamatamatisi
10. Vula ilembu uyithele eceleni ubusuphendula inkukhu ilale ngomunye umhlubulo.
11. Thela amafutha owakha eceleni kwegabha uwathele phezulu.
12. Vala igabha ubhekhe okweminye imizuzu engu-30.
13. Bona ukuthi i-oveni yakho yehliswe yaba ku 300-325 degrees.
14. Susa isivalo uyekele inkukhu yakho ivuthwe okwemizuzu uyiphenduphendula kanye lehanyanisi lamatamatisi.
15. Nxa isiluthuthuvana oluhle ikhuphe isivuthiwe.
Ukudliwa
– Yenza umhluzi kuqala
– Sika amaqatha ayizibhebhedu ubususidla lamatshakada, amagwili irayisi kumbe isitshwala.
Inkukhu eyi-stew
Okudingakalayo
– amakheyigi amabili enyama yenkukhu
– isawudo le-pepper
– umganu wokuphekela ku-oveni
– umhluzi wenkukhu owenziwa kudala wabekwa (chicken stock)
– ihanyanisi ekhanzingwe ndawonye lamatamatisi
Ukupheka
1. Xhwathisa inkukhu ize ibe buthakathaka.
2. Susa amathambo ubusuyiqobaqoba iziqa.
3. Faka iziqa lezi ku-casserole dish
4. Faka isawudo le-pepper.
5. Thela umhluzi otshisayo phezulu kweziqa.
6. Thela njalo ihanyanisi elamatamatisi kuyo inkukhu.
7. Faka ku-oveni etshisa okuyi 300-320 degrees
8. Yekela kuvuthwe okwemizuzu engu-30.
Ukudliwa
-Kungadliwa lesitshwala kumbe irayisi, loba amatshakada lamagwili. Dlana ukholise kule iKhisimusi ukudla oziphekela khona.
