Uncategorized

Ngumhlambi kazalusile eTennyson Hlabangana

22 Dec, 2014 - 10:12 0 Views
Ngumhlambi kazalusile eTennyson Hlabangana

uMthunywa

NguThando Mpofu loNdumiso Sibanda
NGEMPELA okulempondo akufihlwa emgodlweni nanko phela  kuyonale iviki kulabafundi besikolo seTennyson Hlabangana High School eHope Fountain abedlula i-20 abamiswe isikolo ngemva kokutholakala bephaquza imbanje, uMthunywa ukuzwile lokhu.

Isehlakalo lesi esibangele ukuthi kuze kubizwe abazali andubana abantwana bamiswe isikolo senzakale ngoMvulo kuviki ephelileyo.

Abasiki bebunda babikele iphephandaba ukuthi ngaphambi kokubanjwa kwebafundi laba bezitika ngezidakamizwa lezi  ukuhluluzwa kwabafundi abancane besokuyinto yansuku zonke.  Kubikwa abafundi laba bebesithi bangadakwa zimbanje lezo bayehlukuluza abanye abafundi ngokubatshaya, emacansini  kanye lokubathathela impahla kanye lokudla kwabo.

Kuzwakale ukuthi ithumba leli lidubuke ngoMvulo ngemva kokuba omunye umfundi ekhande abanye  abafundi abafika itshumi bethe gwaqa kwenye indlu eyayingeyokufundela ebizwa ngokuthi yi-Boston okulibizo elaphiwa indawo leyo ukuze bezwane lula nxa sekuyisikhathi sokuyabhema.

Kubikwa umfundi lo wabikela abaphathi besikolo bona abangazange bathande ukuphozisa amaseko ngoba bahle babikela amapholisa.

Omunye umfakazi ubikele iphephendaba likazulu ukuthi ngesikhathi amapholisa echwayisisa kwavela ukuthi abafundi laba babethengiselwa imbanje ngesinye isakhamuzi esiqanjwe ngokuthi nguMakheyi Nkomo.

“Ngemva kokubanjwa kwabafundi laba batholakala belezinye imbanje ezikhwameni zabo andubana kuvele ukuthi abafundi laba babevele begila imikhuba belixuku labafana abedlula i20.

“Amapholisa athi efika  emzini kaMakheyi amthola esemsembenzini kodwa ugogo wakhe waziveza lezo mbanje ezazingaba yikilogilamu eyodwa,” kutsho uAnele Ngwenya.

Kuzwakale ukuthi uNkomo wathathwa ngamapholisa ukuze ayencendisana labo ukuchwayisiso.

UMthunywa uzwe njalo ukuthi okwakhathesi inengi labafundi laba sebemisiwe esikolo kukanti abanye babo kulindelwe abazali.

UMthunywa ufike kuleso sikolo ukuze adingisise mayelana laloludaba. Ngesikhathi intatheli zifika kulesisikolo bekulamapholisa akade ekhanya echwayisisa mayelana lodaba lolu.

Omunye umbalisi owale ukuqanjwa ngebizo uthe udaba lolu lokhu lusadingisiswa ngamapholisa njalo inani labantwana akade bebhema izidakamizwa lezi lokhu lisanda.

“Amapholisa lokhe enyakazela esikolo edingisisa ngaloludaba njalo bonke abantwana abaqanjiweyo bayakhwathazwa ukuze kuhlolwe ukuthi abasalanga lezinye imbanje lezi,” kutsho umbalisi lo.

UMthunywa  uthe ebuzisisa ngaloludaba kubaphathi besikolo bathe abavunyelwa ukukhuluma lentatheli ngoba udaba lolu solusezandleni zamapholisa. Ubuye walayela intatheli ukuthi zikhulume lo-District Education Officer ( DEO).

“Okwakhathesi thina njengabe-SDC asilamandla okukhuluma ngaloludaba. Lingakhuluma lo-DEO we-Imbizo District,” kutsho lesi siphathamandla.

UMthunywa wenelise lokuxhumana ecingweni loMakheyi Nkomo yena okubikwa nguye obesipha abafundi imbanje.
UMnu Nkomo wale wemba phansi ukuthi  wayethengisela  abafundi besikolo lesi imbanje.

“Imbanje ngangilazo sibili ngoba ngake ngasebenzela eBinga nyakenye kodwa bengingazithengisi njalo angizange ngiziphe abantwana besikolo.

“Umngane wami osebenza esikolo nguye engandise ukubhema laye imbanje. Umntanakhe nguye owafika emzini wami ezothatha imbanje lezo samuntu othunywe nguyise ngakho mina angizange ngicabangele ukuthi angabe esiyazibhemela imbanje lezo labanye abafundi,” kutsho uNkomo.

UNkomo uqhubekele phambili wathi udaba lolu seluvela emthethwandaba lapho afike wahlawuliswa khona imali engange$50 yokutholakala elezidakamizwa.

Omele izakhamizi uMnumzana Abednico Sibanda uthe into eyenzakele esikolo leso imbi kakhulu njalo isigaba sifuna ukuthi inswelaboya lezo ezipha abantwana izidakamizwa zijeziswe.

“Sibuhlungu kakhulu ngendaba eyenzakale esikolo ngakho sifuna ukuhlala phansi lezakhamizi sizikhuthaze ukuthi zixekane lomkhuba wokuxhwalisa abantwana besikolo ngezidakamizwa,” nguMnu Sibanda lowo.

UProvincial Education Director wakoBulawayo, uMnumzana Dan Moyo ubike ukuthi udaba olunjalo alukafiki endlebeni zakhe.

“Bengingakezwa mayelana lodaba lolo ongibuza ngalo kodwa sengizadingisisa njengoba sengizwile,” kuphetha uMnu Moyo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds