uMthunywa
YiNtatheli kaMthunywa
SAVELA sabika ukuthi uZephaniah Ngodzo uzabuyela kuChicken Inn, nanko sekwanzakele.
UNgodzo lomngane wakhe uLawson Nkomo obetshibilikela iHighlanders sebencengisa kuChicken Inn, okuveza ukuthi abadlali bobabili bazadlalela iqembu leli kulisizini.
Lamhlanje uMthunywa uyabika ngokumqoka ukuba uLawson “Lolo” Nkomo usesiyadlala kumaGamecox.
Abadlali bobabili baqale ukulolonga ngaphansi komqeqetshi uJoey Antipas ngoMvulo. UMthunywa ubekuhlandla lokulolonga kwalithimu ngoLwesithathu, lakanye uNkomo odlala muva esandleni sokudla, ubonakale elolonga leqembu leli kuyonale iviki.
UNgodzo uphose wakhalala ukudlalela ithimu le ezama kuHighlanders kwehlula.
Iphephandaba likazulu libika ukuba uNgodzo ungena kuChicken Inn kulandela ukuncengelwa ngezinye inkokheli zeqembu.
IChicken Inn iyemukela uNgodzo kanzima ngemva kokuthi ayizange ithabe ekuthini umdlali lo wasuka wayancengisa kuHighlanders.
UNkomo ngomunye wabadlali abasuke kuBosso bezimele bodwa ngoba ithimu yezwe lonke yehluleka ukunikeza abadlali izivumelwano zokudlala ezintsha.
Phakathi kwaliviki iphephandaba likazulu lincwetshwe indlebe ukuba uNkomo ubonakale ezitaladeni zakoBulawayo ehamba lezinye iziphathamandla zeChicken Inn.
Abafakazi abaqotho kuqembu leChicken Inn babike ngokuzethemba okuphezulu ukuthi ingabe izimisele ngoNkomo.
Kubikwa iChicken inn ibize uNkomo kulandela ukuxwayiswa ngumqeqetshi wayo uAntipas.
UAntipas wathi ufuna lumdlali ngoba embona efanele kuqembu lakhe elithwele nzima ngokudinga abadlali abatshibilika eceleni kwenkundla.
UNkomo loNgodzo zimvimbi ngakho phakathi kwabo ukhona ongathatha indawo kaFelix Chindungwe.
“ULawson Nkomo ugijima lathi kuChicken Inn.Umqeqetshi kakatsho lutho ngaye okwamanje. UZephaniah [Ngodzo] laye usekhona.
“Sekugcwele idolobho lonke ukuthi uLawson uzakuya kulithimu, asimfihlo le esikutshela yona ngoba thina siphakathi kwayo iChicken Inn,” kubika umfakazi oqotho ophakathi kweChicken Inn.
Ebuzwa ngalokhu uNkomo umane wahleka kodwa evuma.
“Ukuzwe ngobani? Sengilolonga leChicken Inn kodwa akukabi lalutho.”
UNkomo ngomunye wabadlali abatshiye kuBosso ithimu ilesikwelede sabo.
