uMthunywa
Cornelius Luphahla
ZIBUKELE ibhayisikopo yamahala izakhamizi zelokitshini leMganwini eSihlahleni koBulawayo lapho amanye amanina angamaloja adindane kwaba luthuli ebanga ukuba elinye kalithenganga amagetsi.
Impi le yenzakale ngoLwesine kuviki ephelileyo lapho uNkosazana Samukeliso Ndlovu abhuqe khona uNkosazana Vivian Magonya wamnyelisa ingalo bebanga ukuba kungani uMagonya engathenganga amagetsi.
UMthunywa uvakatshele kule indawo wakhulumisana loMnumzana Brian Moyo omunye wamaloja la waveza ukuthi ababili laba balwa kuntambama ngemva kokuphela kwamagetsi endlini.
“Kwathi kuntambama uMaNdlovu esapheka amagetsi aphela kulizopha lokuthi uMagonya athenge. UMaNdlovu wathi embuza ukuthi kungani engathenganga yena wathi kalayo imali yokudlalisa.
“Ngemva kwalokho kwaqala umsindo phakathi kwalaba uMagonya wasemtshaya ngempama bahle baqala ukulwa.
Mina ngehluleka ukubalamula ngabiza omakhelwane ukuthi bangincedise kwayikhona sibalamula. Ngalesosikhathi uMagonya wayesenyele isandla sokudla ngapho sevuza igazi ebusweni,” kulandisa uMnu Moyo.
UNkszn Ndlovu ebuzwa ngale indaba uthe okwenza watshaya umakhelwane wakhe yikuthi wayetshengisa ukumdelela njalo engafuni ukuthenga amagetsi.
“Okwenza ngamtshaya umakhelwane yikuthi ngathi ngikhuluma laye wangiphendula okokungidelela. Kuthi kunjalo nxa kunguye okufanele athenge amagetsi uyabe engafuni uze athenge ngemva kwamalanga khonapho thina sifuna ukuwasebenzisa,” kuchaza uNkszn Ndlovu.
Ebuzwa ngale indaba uNkszn Magonya uthe ngamanga ukuthi wala ukuthenga amagetsi umakhelwane wakhe uyamzonda kuphela.
“Ngamanga ukuthi ngihlala ngisala ukuthenga amagetsi njalo kangizange ngakhuluma kubi lomakhelwane wami yikuthi bayangizonda bonke engihlala labo. Okwenze ngangathengi amagetsi yikuthi bengingelamali. Ngokunjalo ngizasuka lapha endlini ngoba bengidalela ingozi emulini yami,” kuphetha uNkszn Magonya.
