uMthunywa
Cornelius Luphahla
LIFIKE komlindi uyacina isela lePlumtree akade selijwayele ukutshontsha omakhalekhukhwini ngemva kokuba libanjwe xhaka selitshontshele omakhelwane.
Isela leli, uCharles Ncube obanjwe sethengise omakhalekhukhwini abathathu akade ebatshontshele omakhelwane ngesikhathi bewalethe ukuzowatshajisa ngakibo.
UMthunywa ukhulumisane loMnumzana Lameck Moyo omunye wabatshontshelweyo wathi ubehambise umakhalekhukhwini wakhe ukuthi ayetshaja wathola kuthiwa kasekho loNcube kakho.
“Mina ngihambise umakhalekhukhwini wami koNcube ukuyatshaja njengensukwini ngathi sengimlanda ntambama ngathola kuthiwa kasekho kucatshangelwa ukuthi uthethwe nguCharles lokaNdlovu loMaNkomo.
“Sazama ukudingisisa ukuthi uCharles angabe eqonde ngaphi sezwa kuthiwa usekoBulawayo.
Lokhu kwenza sahle sabona ukuthi nguye owathetheyo njengoba sasivele sisazi ukuthi ulisela,” kuchaza uMnu Moyo.
Ekhuluma loMthunywa uNkosazana Sakhile Dube ongunina kaCharles uthe sekhathele ngomntanakhe njalo nguye olandele umntanakhe koBulawayo wayamthathela omakhalekhukhwini akade sebathengisile.
“Mina sengikhathele ngoCharles ngoba uhlala etshontsha impahla zabantu sengiswele ukuthi ngimenzeni.
Ngikhuluma nje ngize ngamlandela koBulawayo ngathola sebathengisile omakhalekhukhwini laba bobathathu.
“Lakho kube yinhlanhla ngoba abantu abathengiseleyo ngomakhelwane bami koBulawayo ngakho ngithe ngibalandisela ngendaba le bazwisisa bangipha omakhalekhukhwini laba.
Okubuhlungu yikuthi imali athengise ngayo uthe seyisebenzisile ngakho sengizayibhadala. Noma kunjalo ngisazombophisa sibili umntanami ngoba ugangile,” kutsho uNkszn Dube.
Ebuzwa ngale indaba uCharles uvumile ukuthi watshontsha omakhalekhukhwini wathi kakwazi ukuthi wayengenwe yini aze enze isiga lesi.
“Kuliqiniso sibili ukuthi ngathatha omakhalekhukhwini babomakhelwane kodwa kangikwazi ukuthi ngangingenwe yini.
Lokhu kangiqali ukukwenza ngakho isifiso sami yikuthi izihlobo zami zingise kubafundisi bangikhulekele ukuze kuphele lokhu.
“Okunye njalo ngizacela uxolo kulabo engabathathela omakhalekhukhwini babo ukuthi bengangibophisi kangisaphindi,” kuphetha uCharles Ncube.
