uMthunywa
Cornelius Luphahla
IZAKHAMIZI zesigabeni seSingeni eNkayi zincwebisana igwayi ngelinye inina elixotshe umkalo emzini walo lithi kungani efuna lehlukane lenye indoda ebeselithandana layo.
Indaba le yenzakale kuviki ephelileyo lapho uNkosazana Getty Moyo axotshe khona uMnumzana Dumani Nkomo ethi kungani embuza ngokuthandana kwakhe loMnumzana Limukani Dube.
Kuzwakale ukuthi uMnu Nkomo loNkszn Moyo balomuzi njalo balabantwana abathathu.
Ekhuluma lentatheli uNkosazana Sibonginkosi Dube oyisihlobo sikaMnu Nkomo uthe kalankani ngesenzo esenziwe nguMaMoyo sokuxotsha umkakhe efuna ukuba lenye indoda.
“Kangilankani ngesenzo sikaMaMoyo sokuxotsha umkakhe emzini wakhe bona sebelabantwana abathathu bonke.
Khona kambe kulomfazi olesibindi sokuxotsha umkakhe emzini wakhe.
“Isimanga yikuthi emxotshile enjalo uhle wahlala lendoda leyo akade beyibanga. Lokhu kuyingozi sibili ngoba uNkomo sengabacabangela okunye okungaba yingozi esigabeni,’’ kutsho uNkszn Dube.
UMthunywa ukhulumisane loMnumzana Talent Nkomo ongumnewabo kaMnu Nkomo wathi ngokubona kwakhe uMaMoyo wadlisa umnawakhe yikho enelise ukumxotsha emzini wakhe.
“Ngokwenza kukaMaMoyo kusobala ukuthi uMaMoyo wamdlisa umnawami yikho esenelisa ukwenza intando yakhe.
Kambe kulomfazi ongenelisa ukuxotsha indoda emzini wayo layo ivume.
“Okunye njalo okwenza ngithi umnawami wadliswa yikuthi umkakhe ubemtshiya okwesikhathi eside engambikelanga lokuthi uyangaphi khonapho esiya kuDube esibhedlela lapho asebenza khona. Asazi kumbe ulande imali njengoba uDube esebenza uNkomo kasebenzi.
“Noma kunjalo khona sizahlala phansi njengemuli sikhulume ngendaba le. UMaMoyo nguye okumele aphume emzini womfowethu ngoba indawo ahlezi kuyo ngeyakoNkomo hatshi koMoyo. Ngalokhu ke ngeke samvumela esenza umathanda,” kuveza uMnu Nkomo.
Ekhuluma loMthunywa uNkszn Moyo uvumile ukuthi uxotshe umkakhe emzini wakhe wathi ngoba ubengamncedi ngalutho.
“Kuliqiniso sibili ukuthi umkami ngimxotshile emzini wami ngoba kade engangisizi ngalutho esehluleka ngitsho lokuthengela abantwana ukudla.
“Ngibone kungcono ukuphilisana lomunye ubaba ozabakwazi ukunakekela mina kanye lemuli yami.
“Okokuxotshwa lokho ngeke ngakuvuma ngoba indawo le engikuyo ngeyabantwabami,” kuveza uNkszn Moyo.
Imizamo yokukhulumisana loMnu Nkomo yehlule ngoba ucingo lwakhe lwalile ukungena.
