uMthunywa
Kakhulumi ngokuthatha
KHULU ngicela ungicebise. Sengithandane lejaha lami okweminyaka emihlanu kodwa kalikaze likhulume ngokungithatha. Ngileminyaka engu-30 yokuzalwa njalo abangakithi sebengibuza ukuthi ijaha lami lingabe lingithanda kumbe lidlala ngesikhathi sami.
Ngenzeni Khulu ngoba abangane bami bonke sebenda kusele mina ngedwa. Labomakhelwane bayangihleka. Ngimtshiye kumbe ngimtshele ukuthi akwenzayo kuyangikhuba inhliziyo.
Nceda khulu
Impendulo
Into enhle yikuthi libuzane ukuze lawe uhlale usazi, ngoba kungenzeka ukuba wena ugudumezela abanye imbiza nje.
Kuhle ukuba uhlale laye phansi lizame ukubonisana ngekusasa yenu njalo laye umuphe ithuba lokuba akwazise ukuba ucabangani ngekusasa yenu. Into embi yikuba amantombazana amanengi afuna ukuhlala nje, abesesithi owesilisa nguye ozakhuluma ngomtshado kumbe ngomendo.
Akunjalo umendo kumbe ukuthathana yikwakha umuzi wenu lonke, kungakho-ke kungumlandu wenu lobabili ukuba lixoxe ngawo njalo litsho ukuba ikusasa yenu lifisa ibenjani selilonke njengemuli. Akulunganga ukuba wena uphenduke ube ngumbukeli ulindele ukuba ujaha uzakwenza isinqumo yedwa. Ikakhulu amajaha amanengi athi engaphiwa ucansi akhohlwe yikulungisa ngomtshado ngoba konke akufunayo ayabe ekuthola njalo ngesikhathi asifunayo.
Kuhle uphumele ecekeni lilungise lokhu, kuzakuthi nxa esithi kanelisi ukukuthatha, ube usukhangela ukuba ungatshiyana laye ngoba ungaze ugugele endleleni ungakakhi umuzi wakho. Kodwa okokuthi uzibani wendile, njalo wenza lokhu, lalokhu, akusikwakho, wena isikhathi sakho siyeza lindela wenze izinto kuhle.Yonke into empilweni ilesikhathi sayo, lesakho siyeza, bekezela usilungise.
Induku yami incane
Khulu ngithemba uphilile. Ngiyabonga ngokuphathisa abantu kuhlelo lwakho inhlupho zalamuhla. Umbuzo wami uwodwa nje qha. Kanti nxa ulijaha usazi ukuthi ulenduku encinyane kuyini ongakwenza ukuthi uyiqhelise kancane.
Ngisesesikolo kodwa ngiyesaba ukuthi mhlawumbe angisoze ngenelise ukuzala ngingakhulu. Nceda khulu.
Impendulo
Lapha ngizaphendula ngibhekise kwabesilisa bonke, mzukulu. Ubukhulu kumbe ubuncane benduku kabutsho lutho enhlanyelweni kumbe emacansini. Into enkulu yikwazi ukudlala umdlalo, ungangena emacansini. Induku kasiyo ehlanyelayo, ubukhulu bayo abutsho ukuthi uyazala kumbe hatshi.
Iloba inhlanyelo esele emnyango, ilakho ukuzingenela kuhle iyelungisa ngenzalo. Okwakho ongakufisa yikuba iqholo liqine ubelamadla okudlala umdlalo kabanzi njalo ngobunono lobuciko.
