Ungena kuqubuke uzulu uTjebu Mkhalanga

08 Dec, 2016 - 00:12 0 Views
Ungena kuqubuke uzulu uTjebu Mkhalanga UTjebukani Kuiphe

uMthunywa

BAKAMTHWAKAZI ngezimnandi kuphela kuphephandaba likazulu, kule iviki siliphathele  ingadlangadla yendoda ecula umculo wezamasiko ngesiKhalanga kutsheke ibhetshu endodeni.  

Kambe kungaba yiliphi lelijaha ngaphandle kukaTjebukani Khuphe ijaha elimajaha mabili elihola iqembu elibizwa ngokuthi nguTjebu Mkhalanga. Kayigidi nje lindoda iyaphoxa. Othanda ukujabula kule iviki kaphatheke kule ingxoxo enambithekayo phakathi kukaTjebukani Khuphe (TK) lentatheli yephephandaba likazulu uCornelius Luphahla (CL).

CL: Akutsho jaha lakithi mayelana lembali yakho kanye leyeqembu lakho njengomculi wodumo?

TK: Mina ngazalelwa esigabeni sakoMasendu ePlumtree okuyikho engakhulela khona ngabuya ngafunda khona.

Izifundo zami zeSecondary ngaziqhuba eMadlambudzi High School.

Ezokucula ngaziqala ngesikhathi ngisafunda eMadlambudzi ngicula labanye abangane bami engakhula labo.

Ngalesisikhathi ngangisacula imbube kanye lakuma-choir esikolo. Ngaqhubeka ke ngicula ngaze ngaqeda ufomu 4 kwathi ngo2003 sabumba iqembu lethu lembube. Ngemva kwalokho sasuka ekhaya labangane bami saya kwele South Africa kwathi ngo2007 ngasungula iqembu lami.

CL: Njengeqembu lezomculo selakhipha amadlalade amangaki jahelibanzi?

TK: Njengeqembu elitsha kwezomculo sesakhipha i-Single yengoma ethi Ndodzila ngo2015. Okwakathesi sisapheka idlalade elitsha esikhangelele ukulikhipha ekuqaleni komnyaka ozayo.

CL: Lokhe lasungula leliqembu livame ukudlalela ngaphi ingoma zenu mfoka Khuphe?

TK: Ingoma zethu sivame ukuzidlalela kuma shows kanye lemikhosini etshiyeneyo egoqela amadili okuzalwa lemitshado. Emikhosini le bayasimema ukuthi sizojabulisa uzulu ngengoma zethu kanye langemgido. Noma nje sihlala kwele South Africa kodwa siyake sivakatshele kweleBotswana siyebazwisa ingoma zethu kanye lakwelakithi koMthwakazi.

CL: Abantu bathini ngomsebenzi wenu wobuculi eliwenzayo njengeqembu?

TK: Abantu bayawuthakazelela kakhulu umsebenzi wethu njalo basikhuthaza ukuthi siqhubekele phambili sibatshayela ingoma zethu ngoba siyabajabulisa. Okunye njalo basikhuthaza ukuthi sibaphekele idlalade ukuze bazizwele bebodwa umculo wethu.

CL: Njengeqembu elijabulisa umphakathi likhangelele ukwenzelani abalandeli benu jikelele?

TK: Sikhangelele ukuthi ngemva kokukhipha idlalade sikhiphele uzulu ividiyo yedlalade lethu ukuze azibonele ukudla kwamehlo. Okunye njalo sikhangelele ukuthi singakhipha idlalade lethu siqale ukuvakatshela uzulu endaweni ezehlukeneyo simtshayela ingoma zethu.

CL: Licula libangaki eqenjini lenu njalo idlalade lenu eliliphekayo lilipheka libangaki?

TK: Thina sicula singamalunga ayisikhombisa kodwa idlalade lethu silipheke sincedisana labanye abaculi abatshiyeneyo. Abaculi laba bagoqela uZee Wengoma umculi we House Kwasa, uTona ophuma kweleBotswana kanye loKuseri oweHarare.

Okwenza sidinge abancedisi ekuphekeni idlalade lethu yikuthi sifuna ukusebenza ngokubambana njalo sikholwa ukuthi inyathi ibuzwa kwabaphambili ngakho kufanele sidinge usizo kubaculi abadala.

CL: Bunzima bani oyake uhlangane labo njengomholi weqembu njalo nkuthazo bani oyipha abaculi abasasungula?

TK: Ubunzima esiyake sihlangane labo njengeqembu lezomculo yikuthi abanye abantu balobandlululo ikakhulu abaphuma kwamanye amazwe basuka bengawuzwisisi umculo wethu. Okunye njalo sikhathazwa yimali yokuzithuthukisa njengeqembu elisasungula.

Ngakho kubaculi abasakhasa ngithi kababekezele bengadeli ukujabulisa uzulu noma kunzima. Okunye njalo ngithi kabahloniphe uzulu babekwazi ukuthi nguye obathuthukisayo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds