Lingakhangeli umkhathi limani indawo ezinkulu

08 Dec, 2016 - 00:12 0 Views

uMthunywa

Ncekwenhle Ncube
INGCITSHI kwezokulima zikhuthaza abalimi ukuthi balime amasimu abo njengenhlalayenza bengakhangeli umkhathi ngoba kungasilela ukudla esiphaleni sesizwe.

Lokhu kuza kulandela ukuthi abalimi abanengi bazwakala befuna ukugaxa amakhuba ngoba izulu likhanya seliphuzile ukuna.

Intatheli ixhumane loMnumzana Khumbulani Sibanda ongumlimisi eGwanda othe abalimi kumele baqhubeke njengenhlalayenza balime amasimu abo njalo balime belandela izixwayiso zabalimisi ababekwe endaweni abakizo.

Isimo somkhathi sitshengisa ukuthi sesitshintshile kodwa lokho akutsho ukuthi isikhathi sokuna kwezulu asisekho.

Ngokunjalo abalimi kumele baqhubeke ngendlela abalima ngayo njalo balime amasimu abo  njengenjayelo.

“Sikhuthaza abalimi ukuthi balime indawo ezinkulu. Lokhu kuzakhuphula isivuno esizaba laso kusigaba sokulima sika2015/2016. Abantu bengakhangeli umkhathi ngoba kukhanya usujika.

“Sikuthaza njalo ukuthi basebenzise inhlanyelo eziphangisa ukuvuthwa. Lokhu kuzaphathisa ukuthi bazuze ukudla nxa izulu lithe lahamba masinyane,” kuchaza uMnu Sibanda.

Endaweni ezijwayele ukuzuza izulu eliphansi kuhle ukuthi balime izilimo ezifana lamabele lendumba omaqutha. Le yimizamo yokuthi abantu bazuze ukudla okuzafakwa esiphaleni sesizwe.

Abalimi babuye bakhunjuzwa ukuthi kungumlandu wabo ukuthi bagcine isizwe sisutha. Kuyikho nje bekhuselelwa ukuthi balime ukudla okuzenela abantu bonke kuze kusale ukuze nxa kuqhamuka indlala abantu bathole ukudla.

UMnu Sibanda uphinde njalo wakhuthaza abalimi ukuthi bathenge inhlanyelo endaweni ezingathengisi inhlanyelo zobuqili. Lokhu kuzenza babekwazi ukuthi balime mhlobo bani wenhlanyelo hatshi ukugqibela ibhogwe becabanga ukuthi yinkawu.

“Kuqakathekile ukuthi abalimi bathenge inhlanyelo ezakhulisa isivuno sabo. Nxa kulolwazi abalusilelayo mayelana ngenhlanyelo abavakatshele abalimisi abaseduze.

Uphethe ngokucebisa abalimi ukuthi babone ukuba insimu zabo zibiyelwe ukuze izifuyo zingadli izilimo zabo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds