uMthunywa
Ncekwenhle Ncube
UGATSHA lweBiotechnology olungaphansi kweHarare Institute of Technology lufundisa uzulu wonke wakuleli indlela zokulima amakhowa. Imfundiso leyi iqale eHarare mhlaka 2 Mpalakazi njalo bazaqhubekela kwamanye amadolobho.
Kubikwa bonke abafisa ukuhlanganela ekulimeni amakhowa bafanele babhadale amadola angu40 umuntu ngamunye. Imali le igoqela ukubhalisa, imfanelo zokubhala lokubala.
Kubikwa abafundi bazaphiwa incwadi ezibonisa ukuthi baqeqetshiwe.
Intatheli ixhumane loNkosikazi Chiunzi othe uhlelo lolu lokufundisa ukulima amakhowa balusungule eHarare. Uthe bakhangele ukuthi balufikise kwamanye amadolobho.
“Uhlelo lolu silusungule lapha edolobheni leHarare. Khathesi sithemba ukuthi luzakuya kumadolobho anjengeBulawayo, Kadoma leGweru.
“Lokhu kungenxa yokuthi banengi abantu abasitshayela ucingo becela ukuthi sibuye emadolobheni akibo sizofundisa abantu ngendlela zokulima amakhowa.
“Ukulima amakhowa kuhle kakhulu njalo abalimi phose bonke abalima amakhowa nxa belandele izixwayiso babalesiqiniseko sokuzuza isivuno esiphezulu.”
Kubikwa ukulima amakhowa kuze ngesikhathi esiqondileyo ngoba inengi labantu likhanya lisenza amaphurojekithi afana lawokufuya inkukhu.
Ngemva kwezifundo lezi bonke abafundela ukulima amakhowa bazaqala amaphurojekithi abo okuziphathisa empilweni.
Ngaphandle kwalokho ngokuvulwa kwamaphurojekithi lawa kuzenza abantu bazuze imisebenzi, okuzaphungula inani labantu abatsha abasebenzisa izidakamizwa lokutshontsha impahla zabantu.
Abantu abatsha bayakhuthazwa kanye lalabo abenelisayo ukuthi bayekwenza izifundo lezi. Kuzabaphathisa ukuthi bazuze imali yokuziphilisa ngokuthengisa amakhowa lawa.
Kubikwa ukulima amakhowa akuduli kanti njalo akudingi amandla amanengi. Kungakho nje abantu abanengi bayakhuthazwa ukuthi bahlanganyele ezifundweni lezi.
Ilanga lesikhathi sezifundo kwamanye amadolobho afana loBulawayo asikabekwa.
