uMthunywa
Ncekwenhle Ncube
NGESIKHATHI abalimi bekhangelele ukuzuza isivuno esiphezulu noma nje izulu liphuzile ukuna, abalimisi sebekhuthaze abalimi ukuthi bahlole inhlanyelo zabo bengakazigqibeli ukuthi aziphehlwanga okungenza zingamili.
Kulandela ukuna kwezulu lakuqala abalimi abanengi endaweni ezitshiyeneyo sebeqalile ukulima. Indawo ngendawo abantu balima izilimo ezihambelana lomhlabathi langendlela izulu elina ngayo.
Izilimo ezinengi zesintu ezigoqela amathanga, indlubu, amazambane ibhogwe lomumbu zande ukuhlaselwa yimpehlane kungakho abalimi bakhunjuzwa ukuthi anduba befake inhlanyelo yabo phansi kuhle bayihlole ukuze kungasali izikhexe ngesikhathi sokumila.
Ekhuluma lentatheli kaMthunywa uNkosikazi Sitheni Sibanda ongumlimisi eKezi uthe bayazi ukuthi abalimi abanengi basuke bejahe umdaka begijimele ukugqibela inhlanyelo zabo abazigcina eziphaleni noma ziphehliwe.
Uthe baziduduza ngokuthi bazaqabanga nxa kungamilanga kodwa kusuke kube luhlupho ngoba izilimo zabo zisuka zingasakhuli okufananayo okwenza lokuzala kwazo kwehle izinga.
“Abalimi abanengi ikakhulu ekhaya bajaha ukuthi bagqibele inhlanyelo phansi ngoba bethi umdaka uzahamba kodwa akusizi lutho ukufaka inhlanyelo engasoze imile. Kungakho sithi kabahlole inhlanyelo zabo kuqala anduba bezifake phansi.
“Nxa kwenzakele ukuthi bayayisola abayethenga eyinye ukuze belime into abalethemba layo,” kulandisa uNkkz Sibanda.
“Abalimi ikakhulu abafaka intanga zamakhabe, amajodo kanye lenhlamvu zomumbu kumele babone ukuthi inhlanyelo zabo zisaselenhliziyo ngoba yiyo ephawula ukuthi ingamila loba hatshi.
“Kuqakathekile ukuthi abalimi balime izilimo ezivuthwa masinyane ngoba izulu lilinengi kodwa isikhathi sokuna singaba sifitshane,” kutsho uNkkz Sibanda.
Omunye umlimi uNkosikazi Nozithelo Ntombizodwa Nkomo uthe bona inhlanyelo zabo emhlubulweni wakibo esiKhalangeni balendlela yokuzigcina zingaphehlwanga.
“Inhlanyelo iyangenwa yimpehlane nxa ingavikelwanga. Thina kithi sisebenzisa umlotha lempande zomvagazi ezigxotshiweyo ukuze ingadliwa. Nxa kuthe kwenzeka yabanjwa yimpehlane kulendlela ezitshiyeneyo zokuyihlola.
“Kwesinye isikhathi uyayifaka emanzini okuzamila yikho esikuhlanyelayo kuthi endendayo yiyo elahlwayo,” kutsho uNkkz Nkomo.
