uMthunywa
Ncekwenhle Ncube
BAYADELA abalabantwana abafunda esikolo seNyathi High nanku phela sikhanya siqhubekela phambili sifundisa abafundi imisebenzi yezandla etshiyeneyo ngenhloso yokuthi benelise ukuziphilisa ngemva kokuqeda isikolo njengoba imisebenzi ilivela kancane kulezinsuku.
Ngemva kokunanzelela ukuthi ayisibo bonke abafundi abazathi nxa bephuma ezikolo bazuze imisebenzi inkokheli zesikolo lesi zahlanganisa amakhanda lababalisi zaphuma leqhinga lokuthi abafundi bafundiswe imisebenzi yezandla engabaphilisa kusasa.
Kusukela kubanga likaFomu 1 kusiya kuFomu 4 abafundi baqeqetshwa ngobuciko bemisebenzi yezandla kungakhathalekile ukuthi yintombi loba lijaha.
Intatheli ibikelwe ukuthi kulamaphurojekithi amanengi afundiswa abafundi agoqela awokufuya inkukhu zokudla lezamaqanda, ingulube lokulima.
Konke lokhu kwasungulwa ngenhloso yokukhaliphisa abafundi ngemisebenzi yezandla lokubethulela ulwazi ngoba ilizwe lakithi liqine ngezokulima.
Ekhuluma lephephandaba umphathisikolo uMnummzana Nkululeko Zidla uthe amaphurojekithi afana lala bakhangelele ukuthi ancedise abafundi ukuthi benelise ukuzuza indlela zokuziphilisa bengakazuzi imisebenzi.
Ubuye njalo wachaza ukuthi abanye abafundi bazazithola besebenzisa ulwazi lolu sebelamapulazi abo okufuya kumbe okulima njengoba ikusasa lingaziwa.
“Sikhusela ukuthi abafundi bethu nxa bephuma lapha babe lokunye okubambekayo okuzabaphathisa kusasa.
Kungakho-ke sibafundisa imisebenzi yezandla.
“Khathesi sikhangelele ukuthi abafundi baqalise ukufundela ukwakha ngoba bakhona abalesiphiwo leso esikhangelele ukuthi sizabaphathisa kusasa.
UMnumzana Taonga Sithole ofundisa ezokulima lokufuya uchazele intatheli ukuthi ulwazi abafundi abalutholayo kuzifundo lezi luyabaphathisa kakhulu ngemva kokuqeda isikolo. Uthe kuzifundo lezi bathola ithuba lokuhlakulela izilimo zabo lokupha izifuyo ukudla.
“Injongo yethu yikuthi abafundi bazuze ulwazi olwaneleyo. Kungakho bayafunda ekilasini babuye bayekwenza lokho esibafundise khona.
