uMthunywa
KUjayelekile ukuthi isinkwa sokunathisa itiye singabikhona abantu baziphekele okokunathisa amadonathi lama-fethikhukhu ngefulawa badle bakholise. Kuqakathekile ukuthi abekhona umuntu okwaziyo ukwenza amadonathi lamafethikhukhu lapha ekhaya. Akukhethelekile ukuthi angaba ngubani. Lamuhla ngizathi fahla fahla ngokwenziwa kwezidlo lezi zombili.
Amadonathi (doughnuts)
Okudingakalayo
Amaqanda amabili
Inkomitsho yetshukela, inkomitsho yochago
Inkezo zokudla ezine (4) zemajarina
Inkomitsho ezine (4) zefulawa engelamvubelo
Inkezo zetiye ezintathu ze-baking powder
Ukhezo olulodwa lwetiye ivanilla lomhluzi
Ingxenye yokhezo lwetiye isawudo
Amafutha okuphekisa
Udengezi lokuphekela lephini, ingxenyeyenkomitsho icastar sugar.
Izandla ezigeziweyo ezakho
Ukupheka
Tshaya amaqanda letshukela ndawonye lochago lemajarina.
Sefela ifulawa kulokhu okutshayiweyo
Faka isawudo, i-baking powder lomhluzi we-vanilla ngezilinganiso.
Hlanganisa konke kube yinhlama
Vuvuzela epulankeni ifulawa, yendlala inhlama yonke nge-rolling pin.
Sika nge-cutter kumbe imbodlela izincezwana uziphosele odengezini olulamavutha atshisayo eziko.
Yekela kuvuthwe kuze kube luthuthuvana
Nxa sekuvuthiwe khuphela ephepheni ubusuvuvuzela i-castor sugar.
Ukwenza amafethikhukhu
Okudingekayo
Inkomitsho zetiye ezine (4) zefulawa
Inkomitsho yetiye yamanzi aqandayo.
Inkezo zetiye ezintathu 3 zomkhukhumezo (baking powder)
Ukhezo lwetiye isawudo, udengezi lokuphekela.
Umganu wokuhlanganisela.
Amafutha okupheka alingeneyo, ngeza izandla zakho.
Ukwenziwa kwamafethikhukhu
Sefela ifulawa emganwini wokuhlanganisela.
Sefela njalo i-baking powder, phinda njalo usefele isawudo.
Thela amanzi ngesilinganiso osiphiweyo phezu kwefulawa.
Khathesi hlanganisa ndawonye ngephini
Tshisisa amafutha asodengezini bona ukuthi awatshisi kakhulu njalo awamanengi kakhulu.
Khana inhlama ngokhezo lokudla uyifake odengezini, khana njalo inhlama uyifaka odengezini luze lugcwale.
Vala ngesidikiselo ukwenzela ukuthi kukhukhumale njalo kuvuthwe.
Phendula kuvuthwe inxa zonke.
Ukudliwa
Ama-doughnuts lamafethikhukhu ngawokunathisa itiye kawadingi okunengi ngokuthanda kwakho, ungawadla lejamu loba imajarina.
