Intsha yeNkulumane ithuthukiswa ngemisebenzi yezandla

11 Nov, 2016 - 23:11 0 Views
Intsha yeNkulumane ithuthukiswa ngemisebenzi yezandla

uMthunywa

Ncekwenhle Ncube
NGENHLOSO yokuthuthukisa intsha eNkulumane koBulawayo uMeli wedale lePhalamende uMnumzana Killian Sibanda usezinekele ukubafundisa imisebenzi yezandla ukuze benelise ukuzuza imisebenzi lemali yokuziphilsa.

Intantheli zindaba ibikelwe ukuthi intsha yeNkulumane engaphansi kukaMnu Sibanda isikhomba ngaphakathi kulandela ukubabhadelela izigidi zemali ukuze bayeqeqetshwa emisebenzini yezandla eSizinda Vocational Training Centre.

Iphephandaba likazulu lixhumane loMnu Sibanda yena ochaze ukuthi abantu abatsha yibo abaphethe ikusasa yaleli ilizwe kungakho nje kufanele bafundiswe ukuze babe zinkokheli ezikhaliphileyo.

Ubuye njalo wabikela intatheli ukuthi intsha enengi ibihleli phansi ingelakho okokwenza kodwa khathesi abanengi sebezuze amathuba okufundela imisebenzi yezandla engenelisa ukubasiza ekuthini bathole ukuziphilisa.

“Abantu abatsha yibo abakhokheli bethu bakusasa, yikho kufanele ukuthi sibafundise ukuze babe zinkokheli ezikhaliphileyo ezizenelisa ukuthuthukisa ilizwe lethu kwezomnotho.

“Okwakhathesi ngikhuluma nje kulabatsha abayi-750 abafunda besemisebenzini esibafundise eSizinda Vocational Training Centre. Sikhangelele ukuthi ngomnyaka ozayo sibe labatsha abazafika 300 abazaqala ukufundela imisebenzi efanayo.

“Bonke laba abafundayo akulamali abayibhadalayo, yithi esibaphathisayo njengoba sinanzelela ukuthi isimo somnotho asikho sihle ngakho inengi alenelisi ukuzimela lodwa.” Kuchaza uMnu Sibanda

Kubikwa imisebenzi yezandla le igoqela eyamajaha lezintombi kanti njalo labomama labo bayalizuza ithuba elifanayo.

Imisebenzi efundelwa lapha igoqela eyokuba ngumanjinela, ukulungisa amagetsi, ukufundela ukusebenza emahotela, ukucecisa emitshadweni, ukweluka inwele, ukupheka ijam le-tomato sauce leminye imisebenzi eminenginengi yezandla.

UMnu Sibanda ugcizelele kakhulu ukuthi kuyinhloso yehofisi yakhe ukuthi ngemva kwale imfundo bonke abafundileyo bazithole belolutho lokwenza hatshi ukutshona bethatha izidakamizwa, ukutshontsha kanye lokwenda besesebancane.

Uthe njalo ufisa ukuthi bazivulele awabo amankampani lapho abazaqhatsha abanye abantu abatsha.

Ngaphandle kwalokho intatheli ibikelwe ukuthi ihofisi isivule i-website ebulenjini ebaxhumanisa lamanye amankampani adinga izisebenzi ukwenzela ukuthi labo asebeqeqetshiwe babadingele imisebenzi kuhle.

UNkosiyabo Dube ongomunye wabafundi ababhadalelwa nguMnu Sibanda uchazele iphephandaba ukuthi kube yisibusiso ukuzuza umkhokheli ofana loMnu Sibanda njalo uyakunanzelela ukuthi izifundo lezi abazitholileyo ziyabaphathisa ngoba sesenelisa ukuziphilisa njengomuntu omutsha.

“Umhlonitshwa uyasiphakamisa njengabantu abatsha eNkulumane. Ngemva kokuthi esesithethe wasibhadalela sesisenelisa ukuthi siziphilise njengabantu abatsha.” Kuphetha uDube.

 

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds