uMthunywa
Ncekwenhle Ncube
IZAKHAMIZI zikaVillage 9 e-Allendale indawo eseFort Rixon zitheleke phezu kwesigelekeqe ebesesihluphile esigabeni zasigongoda saze safa.
Isiga lesi senzakale ngoLwesibili kuyonale iviki ngehola letshumi ekuseni lapho uMisheck ‘Sikente’ Khanye (24) obedingwa ngamapholisa ngamacala akhe agoqela ukubamba amanina iganyavu, ukugqekeza kanye lokubamba inkunzi ahlaselwe wabulawa ngabantu.
Kubikwa abantu abangafika amatshumi amane baqoqane bamnqamekela andubana bamtshaye kabuhlungu wabaleka waze wayakuwa esesenkambeni yamapholisa lapho aphelele khona.
UMnumzana Hebert Gumbo olipholisa lesigaba kulindawo uthe umuyi wagada igonyethi elomasihlalisane wakhe engazi ukuthi abanye ababephakathi babesazi ukuthi uyadingwa.
“Lababantu ababesegonyethini kubikwa babhalelana amaWhatsApp betshelana ukuba uSikente odingwa ngamapholisa ngokudlwengula lokugwaza abantu bagade laye .
“Ngokuphazima kweso laba ababesegonyethini baphinda futhi babhala amaWhatsApp bathumezela ezinye izakhamizi ezaziseShangani bethi uSikente balaye egonyethini,” kutsho uMnu Gumbo.
Uqhubekele phambili wathi ngenxa yokuthi izakhamizi zasezihlutshwe kakhulu nguSikente zaphanga zaqoqana zayalinda igonyethi emgwaqweni.
“Umbiko lo wasabalala kakhulu okokuthi igonyethi isiyakuma ezitolo zeShangani kwakulabantu abafika phose 40 ababemlindile ngamehlo abomvu.
“Umtshayeli wegonyethi wonela ukumisa imota abantu bahle bayigombolozela umtshayeli laye esephethe etshaya ihuta okwenza abanye njalo basondele,” nguGumbo lo.
Wengezelele wathi abantu bahle bamhlasela kwaba luthuli uSikente esebongolela sankomo.
Abanye babemgongoda ngamatshe, abanye bemtshaya ngenduku kuthi abanye labo bazithaphuzela ngezibhakela langezicathulo ngenxa yokuzonda.
UMnumzana Obert Ndlovu oyisakhamuzi laye oke wahlaselwa nguSikente ubikele uMthunywa ukuthi lanxa kwafika ipholisa ngesikhathi abantu betshaya isigelekeqe lesi lehluleka ukulamula.
“Wonke umuntu wayezitshayela ngedlela afuna ngayo lepholisa elilodwa elaliseduze elafika lamfaka izankosi lehluleka ukumlamulela.
“Bamtshaya kakhulu waze wabaleka kodwa ngamanxeba ayeselawo ngenxa yokuthi abantu babengakhethi ukuthi batshaya ngaphi wafika wafa enkambeni yamapholisa,” kutsho uMnu Ndlovu.
Iphephandaba lixhumane loNkosikazi Esther Khumalo oyisakhamuzi seLindeni othe abantu besebekhathele ngezenzo zikaSikente okwenze bajabula besizwa ukuthi abantu bambulele.
“Ukufa komuntu kubuhlungu sibili, angabe eyisigebenga kumbe elungile kodwa iqiniso yikuthi abantu bathokozile besizwa ngokufa komuntu obesesihluphile esigabeni.
“Kudala wakhathaza abantu njalo thina njengabomama besesisesaba ukuhamba lingatshona ngoba banengi bebanjwa iganyavu ngumuntu lo. Mina ngikhuluma nje ngahanjelwa yimpahla yami phose yonke ngalujaha.
Amapholisa sawabikela wabotshwa kodwa akuzange kwamtshintsha,” kutsho uNkkz Khumalo.
Izakhamizi zibike ukuthi kulomunye umdeni oncedise kakhulu ekutshayeni umufi lo ngoba ebambe elinye ilunga lemuli yabo iganyavu.
Ekhuluma lentatheli omunye olilunga lomdeni wangakibo kaSikente uthe umfowabo ubehlupha kakhulu esigabeni kungakho nje abantu baze bambulala.
Isikhulumi samapholisa eMatabeleland South uInspector Philisani Ndebele uvumile ukuthi kulendaba enjalo eyenzakeleyo eShangani.
