uMthunywa
UKUMEMETHEKA komkhuhlane wemvukuzane ebantwini kanye lokufa kwabanye babo sekubangele ukukhathazeka kuzulu. Kuqakathekile ukuthi uHulumende aqalise ukukhangelisisa kunye lokuthi enze imizamo yokuthi abantu abalomkhuhlane lo bathole uncedo kuHulumende.
Okwenza umkhuhlane wengculazi wathola usizo kunhlanganiso ezizimele zodwa kunye lakuHulumende yikuba kwananzelelwa ukuthi umkhuhlane lo uyingozi enganani empilweni yoluntu; abantwana, abadala kanye labatsha.
Ngokufanayo umkhuhlane wemvukuzane lawo kusobala ukuthi uyingozi njengomkhuhlane wengculazi.
Inyanga kaMfumfu yinyanga ebekwe eceleni yokufundisa abantu ngengozi ngomkhuhlane wemvukuzane yebele.
Umuntu ozithola eselomkhuhlane wemvukuzane ubhekana lobunzima bemali kunye lokungahlaliseki engqondweni yakhe ngoba umkhuhlane lo uyabulala.
Umkhuhlane wemvukuzane yebele ulakho ukuhlasela abesifazane kanye labesilisa ngokufanayo. Kubikwa umkhuhlane lo umuntu angaba lawo ngoba ukhona owake wabalawo emulini kumbe njalo abe nguye owokuqala emulini ukuba lomkhuhlane lo.
Odokotela ngokunjalo bakhuthaza abantu ukuthi bahlale ngazo zonke izikhathi bezihlola amabele abo ukuze babone nxa besiba lamaqhubu. Umuntu angavele ananzelele lokhu kuhle ukuthi aphangise aye kudokotela nxa engabona amaqhubu kumbe ukuvuvuka kwebele angakuzwisisiyo.
Kuleli kunzima ukuthi umuntu olomkhuhlane wemvukuzane asile ngoba imithi yakhona iyadula njalo lokuya emtshineni we-chemotherapy kuleli kuyadula. I-chemotherapy kubikwa ukuthi incindezela ukumemetheka komkhuhlane lo emzimbeni.
Inengi labantu kuleli abalemvukuzane baba sesimeni esinzima kakhulu ngoba abanye babo bacina besebenzisa izigidi zamadola ukuze bayekwelatshwa kweleSouth Africa. Lokhu kusuka kube ngumthwalo olukhuni kakhulu kogulayo ngoba izigidi zemali lezi ziyabe zikhangelelwe ukuthi ziphume esikhwameni sakhe kunye lezihlobo.
Ngenxa yalokhu kungumbono kaMthunywa ukuthi uHulumende aqalise ukufaka umkhuhlane wemvukuzane kunhloso yelizwe (national agenda) ngoba uyingozi kumpilakahle kazulu.
Nxa umkhuhlane lo ungafakwa kunhloso kaHulumende, ugatsha olubona ngezempilakahle luzakwenelisa ukuthi lubone ukuthi labo abalemvukazane bayathola usizo ezibhedlela zikaHulumende ngemali elingeneyo ezakweneliswa yiloba ngubani.
Kumele sinanzelele ukuthi nxa umkhuhlane wemvukuzane ungaba kunhloso kaHulumende kuzakuba lula ukuthi inhlanganiso ezizimeleyo, abancedisayo (donors) kanye lenhlanganiso yamazwe onke (United Nations) zenelise ukuncedisa ngemali ezakwenza labo abalomkhuhlane wemvukuzane bathole uncedo lwemithi lamaphilisi kanye le-chemotherapy kuleli ngemali encinyane kumbe njalo kungela mbhadalo.
Kuqakathekile njalo ukuthi umuntu munye ngamunye akubone kungumlandu wakhe ukuya vakatshela esibhedlela nxa kukhona akusolayo emzimbeni wakhe ukuze aphange ayohlolwa ukuthi kalawo umkhuhlane lo ukuze elatshwe kusesemasinya.
Omama bayakhuthazwa njalo ukuthi bahlale besiya ku-pap smear ukuze bahlolwe imvukuzane yesibeletho.
Sitshayela inkampani yeZimpapers ngokuzipha umlandu wokuphathisa kumthwalo wesifo lesi nanko phela kuviki ephelileyo ngoLwesibili izisebenzi zalinkampani bezilelanga elibizwa ngokuthi yi-tackie day lapho ebezigqoke impahla zomsebenzi kanye lamathenesi ngenhloso yokudinga imali yokuphathisa kumkhankaso lo.
Umkhuhlane wemvukuzane ungahlasela yiloba ngubani, ungaba kuloba yiphi indawo emzimbeni njalo uyabulala.
